Nga ïaleh election na ka bynta ban weng ïa ka jingeh jong ki paidbah: Methodius Dkhar

Nongstoiñ, Ïaïong, 10: U bah Methodius Dkhar u ba la shah jied kum kyrtong ka HSPDP jong ka Mawshynrut Constituency na ka bynta ban ïakhun ïa ka election ha u snem ban wan, haba kren hadien ba ka party ka la pynshkem u ha ka jingïalang kaba la ong ha madan jong ka Rongrin Secondary school ha ka shnong Umdang, u la ong ba ka thong ba hakhmat duh ka jong u ban ïaleh biang ïa ka election ha u snem ban wan, ka long ban weng ïa ka jingeh ba ki paitbah ki la mad ha kine ki saw snem tam, hadien ba u bah Witting Mawsor um shym la shah jied shuh kum u nongmihkhmat jong ka Constituency.
Haba kren halor katei ka phang u bah Dkhar u la ong ba ka watla ha u 2013 u la ïaleh pyrshah ïa u bah Witting Mawsor. Hynrei ha ka election jong u snem 2018 wat la um shym la ïaleh shuh ïalade, hynrei haba u ïoh sngew ha ka resol ba u bah Mawsor u la shah rem, ka mynsiem jong u ka pang haduh katta katta.Namar u ïohi ba u bah Witting haba u long kum u nongmihkhmat u don ka jingkitkhlieh ïa ka jingeh ki paitbah ym tang ha ka Constituency jong u hynrei ïa ki paitbah ha ka jylla hi baroh kawei.
Nalor kata u la ong ruh ba hadien ka jingshah rem noh jong u bah Witting, haba u ïaid kylleng ki jaka ha ka jylla bad ha ka Constituency, u la ïohi ba ka rukom jong ka jingtreikam jong kane ka sorkar, ka la kylla da kumwei bad ka la buh pynban ïa ki paitbah ha ka jingeh kaba khraw ha baroh ki liang, la ka long ha ka khaïi ka pateng, ka thungkam thungjam, ka kamai kajih bad ka rukom pyntreikam ïa ki jingiarap kiba ka sorkar ka la mang na ka bynta ki paitbah nongshong shnong.
U bah Dkhar u la ong ruh ba jingkylla jong ka rukom treikam ka la ktik ïa ka jingmut jingpyrkhat jong u, hynrei um lah leh ei ei namar ba um dei satia u nongmihkhmat. Ha kajuh ka por u la ong ba u la pyrshang ban peit bniah ruh ïa ki nongrim treikam jong ki party bapher bapher kiba don hapoh ka jylla, ha kaba u la lap ba dei tang ka HSPDP kaba don ïa ki mat treikam kiba lah ban pyllait ïa ki paitbah na ki jingeh bad ba ki nongïalam ki ieng skhem halor kitei ki nongrim naduh ba sdang haduh mynta.
U la ong ruh ba ki la don shibun ki riew rangbah bad ki nongïalam jong kiwei pat ki party, kiba la wan ban ïakynduh ïa u bad tyrwa ruh ban pynïeng kum u kyrtong ha ka election ban wan. Hynrei um treh satia namar u la dep peit bniah ïa ki mat treikam jong ki bad um sngew hun satia ha ka mynsiem jong u. Ha kajuh ka por u la ong ba dang ha u snem ba la dep, ki la don ki nongïalam jong ka party HSPDP na ka Mawshynrut Constituency kiba la wan ban ïakynduh bad ai jingmut ba un wan phai biang sha ka saiñ pyrthei da kaba rung noh ha ka HSPDP, ha kaba katei ka jingwan ïakynduh jong ki ka la pyntngen ïa ka mynsiem jong u.
U la bynrap ruh ba dei tad haduh ka khyllipmat kaba u bah Witting Mawsor u la wan dalade ban ïakynduh ïa u bad hadien ka jingïaphylliew jingmut bad ka jingïatai kaba bniah bha, ba u bah Witting u la pynthikna ba un ym ïaleh shuh ha ka election ban wan bad u la kular ruh ba ïatreilang bad ban ai ka jingkyrshan ba pura.
U bah Dkhar u la kyrpad ïa baroh ki paitbah ka Constituency ba kin ïatreilang da ka jingieit bad ka jingsngewrit khlem da ñiew shilliang khmat ïano ïano ruh la ki dei kiba duk kiba kyrduh, kiba riewspah bad kiba don ba em. Hynrei na ka bynta ban wanrah ïa ka jingkylla la ka long ha ka roi ka par, ka mai kajih, ka khaïi ka pateng, ka thungkam thung jam bad kiwei kiwei kin ïatreilang ha ki por baroh, haduh ban da poi ka sngi thep vote, khnang ba kin ïoh ban kheit ïa u soh jong ka jingjop.
U la kyntu ruh ïa ki paitbah ba kim dei ban shah ïalam bakla ha kiwei pat, namar lada ki bakla ban jied ïa ki nongmihkhmat ha kane ka election ban wan, ym lah ban tip kaei ka ban jia ïa ki khun ki kti ha ka pateng ban wan. Namar ym lah ban len ba ha kine ki sngi ka jingshah ïuhroit ïa ka hok longtrai jong ki paitbah ïa ka khyndew ka shyiap, ka khaïi ka pateng, ka kamai kajih ka bad kiwei kiwei ka la sdang. Hynrei ym don kiwei pat ki seng saiñ pyrthei kiba nud ban kren ïa kitei ki mat, pynban ki nongïalam ka HSPDP naduh ba sdang haduh mynta kim shym la sangeh ban dawa bad kren ïa kitei ki mat ba ka jaitbynriew ka donkam eh.