Shillong, Nohprah 18 : U MDC ka Tura ba dei ruh u nongïalam ka BJP ha ka jylla, u Bernard N Marak u la pynpaw ka jingsngewskhem ba un jop beit ha ka elekshon MLA kaban long la shem snem na South Tura, ka constituency kaba mihkhmat mynta da u Myntri Rangbah ka jylla, Conrad K Sangma.
Utei u MDC u la ïathuh ruh ha ki lad pathai khubor ba ka jingshah kem jon gu dang shen kan ym ktah satia ïa ka jingpynkhreh jong u ban aireng pyrshah ïa u Myntri Rangbah ha ka elekshon MLA ha u 2023.
“Kane kan ym ktah satia ïanga namar ki paidbah ha ka thaiñ jongnga ki la tip ïa ka jingshisha bad kumta ka jingshisha hi kan ieng..Kan ym ktah satia ruh ïa ka jingpynkhreh jongnga ban ïakhun pyrshah ïa u Myntri Rangbah namar ngi la jop nangtei,” u la ong.
U Marak dang shen u la ïoh jamin hadien ba u la shah kem halor ka jingshah kynnoh ba u pynlong ktem awria ïa ka sem jong u ha Rimpu Bagan. Haba jubab halor ka jingkylli, u Marak u la ong ruh ba ka South Tura kadei ka constituency kaba don ïa ki nongthep vote kiba la stad bad kiba la shai suda bad kumta kin ym jied satia ïa ka pisa.
“Ïa mynta lada u MLA u kyrmen ban jop da ka bor pisa, kan ym treikam satia namar ki paidbah ha Tura kin jied ïa u nongïalam ym ïa u politishan,” u la bynrap shuh shuh. Katkum ka jingong jong u, bun ki nongïalam ki kylla long ki politishan hynrei ym don napdeng jong ki, ki ban long ki nongïalam namar kim shim satia ïa ka jingkitkhlieh.
Da kaba pynpaw ïa ka jingsngewkhia halor ka jingpynslem jong ka sorkar ban pyllait noh ïa ka tulop ba dang sahteng sha ki nongtrei bad ki skim sha ki nongïoh jingmyntoi, utei u MDC u la ong, “Ha kane ka samoi leh kmen, kadei ka kamram jong u nongïalam bad pyrshang bad siew lut ïa kaba sah baroh lym kumta kan ym dei satia ka Kristmas kaba kmen hynrei ka Kristmas kaba dum na bynta baroh. Kumta dei ban siew lutnoh. Kumta kum kiba ngeit ha u Kynrad, ngi dei ban pynleit jingmut ban shakri ïa ki paidbah ym na ka bynta ka jingïoh nong ïalade.”
Nalorkata, u la kynnoh ruh ba u Myntri Rangbah u la pynlut kham bun ha ki prokram pynbyrngia kiba rem dor.
Shuh shuh u ong ruh ba u Myntri Rangbah ba bat artad ïa ka pla tyngka kadei ka kamram jong u siew dep lut noh ïa ka pisa kaba sah lut ym ban shu pyrkhat ban pynlong tang ïa ki concert. U ong ruh ba ïa kum kitei ki lympung lah ban pynlong hadien ym mynta ha ka por ba bun ki longiing ki shah knieh lut ïa ka hok ba ki dei ban ïoh.
