Shillong, Nohprah, 18: “Ka por kam slem shuh haba ka ri India kan sa pynlong ïa ka lympung ïalehkai ba syriem kum ka World Cup bad manla u nong India un kyrshan ïa la ka jong ka kynhun,” ong u Myntri Rangbahduh ka Ri India haba kren ha ka jingïalang plie ïa ki projek bapher bapher ha nongbah Shillong ha ka sngi U Blei.
U Narendra Modi u la khring ïa ki jingmut jingpyrkhat jong ki paidbah ha kaba la jia ryngkhat ba ka jingïalang mynta ka sngi ka long ha ka madan ïalehkai phutbol ha ka por haba ka jingïalehkai phutbol World Cup ka dang ïaid mynta.
“Ha kawei ka liang, ka don ka jingïakhun jong ka lympung ïalehkai Football kaba dang ïaid mynta, katba hangne ngi ïalam ïa ka jingïakhun jong ka roi ka par ha ka madan ïalehkai phutbol. Watla ka phutbol World Cup ka la long ha Qatar, ka mynshiem shitrhem jong ki briew hangne kam long kaba duna,” u la ong.
Da kaba pynïasyriem ïa ka Red Card kaba pyni ha ka jingïalehkai Football sha u briew uba ïaleh pyrshah ïa ka mynsiem ïalehkai, u Modi u la ong ba ka Sorkar ka la pyni Red Card ïa baroh ki jingeh ba wan ha lynti jong ka roi ka par ka thaiñ Shatei Lammihngi.
“La ka long ka jingbamsap, ka jingñiew beiñ, ka jingleh shiliang, ka jingthombor lane ki vote bank politic ban pynthut ïa ka roi ka par ha ka thaiñ, ngi trei da ka jingaiti bad ka hok ban rat dyngkhong ïa kine ki jingsniew baroh,” u la ong.
U Myntri Rangbah duh u la ong ba watla kum kine ki jingsniew ki la suh thied bha, ngi hap ban trei ban weng ïa kine iwei pa iwei. U la bynrap ruh ba ki sienjam jong ka sorkar ki pyni ïa ki resol kiba bha.
Haba pynshai halor ka roi ka par ha ki kam ïalehkai, u Modi u la ïaiban ba ka Sorkar Pdeng ka la ïaid shaphrang da ka rukom treikam kaba thymmai bad ïa ki jingmyntoi jong ka lah ban ïohi shai ha ka thaiñ Shatei Lammihngi ruh.
U la pyntip ba nalor ka skulbah ha ki kam ïalehkai kaba nyngkong jong ka ri, ka thaiñ Shatei Lammihngi kadei kaba la biang bun ki jingdon jingem kum ka multipurpose hall, ka madan ïalehkai phutbol bad ka Athletics Track.
U la bynrap shuh shuh ba ka kam ka dang ïaid mynta ha khyndai phew tylli kum kine ki projek. U Modi u la ong da ka jingpynthikna ba watla ngi peit ïa ki kynhun jong ki ri bapher bapher ba ïalehkai ha ka phutbol World Ccup ha Qatar, u ngeit skhem ha ka bor jong ki samla bad ong ba ka por kam slem shuh haba ka India kan sa pynlong ïa kum kane ka lympung ïalehkai kaba khraw bad man u nong India un ai ruh ka jingkyrshan ïa la ka jong ka kynhun ka ban ïashim bynta ha ka.
