Shillong, Nohprah 17 : U MDC jong ka Jaïaw Constituency u Bah Paul Lyngdoh ha ka sngi Saitjaiñ u la plie paidbah ïa ka lynti ïaid kjat bad kumjuh ka nala um ba la tap bha da ki tiles ter ter haduh ban da poi sha ka ophis treikam jong ka Khasi Student’s Union kaba don ha ka Jaïaw.
Ïa katei ka jingsiang pynbha bad pynitynnad da ki tiles la shna lyngba ka skim MDC ba la tip kum ka 15th Finance Untied Scheme jong u snem 2021-2022, kaba la pynïoh lyngba utei u nongmikhmat uba dei ruh ha kajuh ka por u President ba rim ka KSU ha ki khyndiat phew snem mynshwa.
Haba kren ha ka jingïalang, u Bah Paul u la pynpaw ïa ka jingkmen ba watla um ïoh ban don bynta shuh bad ka Seng ha ka jingtreikam hynrei ka mynsiem KSU kam pat mih satia na u haduh mynta mynne.
U ong ruh ba watla mynta u don la ka jong ka jylli treikam hynrei ka mynsiem ban shakri bad treilang pat ka dang don bad ka dang rhem haduh mynta. U kular ruh ba kum u nongïalam ba rim bad kum nongmihkhmat un ïai donlang beit bad ha ki kam ba ka seng ka don.
Ha kane ka sngi la donlang ruh u President Rangbah jong ka KSU, Bah Lambokstarwell Marngar ryngkat ki nongïalam ba hakhmat jong ka KSU Seng Kmie nalor kiwei kiwei.
Na ka liang u President u la ïathuh ruh ba ka jingsiang pynbha da ki tiles ïa katei ka lynti ïaid kan pynsuk ym tang ïa kiba wan sha ophis ka Seng hynrei ia baroh kito ki longiing kiba pyndonkam lang ïa katei ka lynti ïaid kaba ju shem shitom bha ban ïaid ha ka por Lyiur namar ka jingbtuid.
