La thaw ïa ka Co-ordination Committee dawa Jylla la ka jong bad ki Garo: Pangniang

Nongstoiñ, Nohprah 12: Ha ka lah sngi u Blei ka 12 tarik Nohprah, ki nongïalam ka Hill State Peopople Democratic Party central body ba la ïalam da u bah K.P.Pangñiang President, ryngkat ki nongïalam ka Youth Wing ki la pdiang burom ïa ki nongïalam jong ka Garo National Council ha ka shnong Mawphanlur, hakhmat u mot sah jingkynmaw ïa u (L) bah Hopingstone Lyngdoh.
Ïa ka kynhun jong ka GNC la ïalam da u bah Augustine Marak General Secretary ka GNC u ba dei ruh u Chief Executive Member barim ka Garo Hills Autonomous District Council ha kaba synran lang ruh da ki dkhot jong ka GNC. Ha ka jingïalang la don ryngkat da u kyrtong ka HSPDP na Umsning bad ki nongïalam ba ha khmat, u bah Martle Mukhim MDC ka Mawkynrew, u bah Witting Mawsor bad kiwei kiwei.
Na ka liang ka GNC u bah Agustine Marak u la pynkynmaw ba ka jingdawa ban ïoh noh la ka jylla Khasi Jaiñtia State bad ka Garo State, ka dei ka jingdawa kaba la rim bha kaba la saiñ dur da ki arngut ki rangbah kiba la bam kwai ha Dwar u Blei kata u (L) Bah Hopingstone Lyngdoh bad u (L) Clifford Marak bad ka la donkam ban pynkhie im thymmai biang.
U la ong ruh ba ha ka por ba u long kum u CEM ka Garo Hills Autonomous District Council, u la rah ïa katei ka mat hapoh ka dorbar jong ka Council bad baroh ki MDC ki la mynjur ha kaba la pass ruh da ka resolution na ka bynta ban phah da ka memorandum sha ka sorkar pdeng.
U la pynkynmaw ba kitei ki nongïalam jong ka HSPDP bad ka GNC ki la aiti bun tylli ki memorandum sha u Myntri Rangbah duh ka ri ban pynsngew halor katei ka jingdawa ïa ka Khasi Jaiñtia State katkum ka Article 371 (k) bad ïa ka Garo Sate kat kum ka Article 371 (J), kiba kynthup ha ka rtiti synshar ka ri. U la ong ruh ba ïa ka Memorandum la aiti khatduh ha ka por ba u Manmohan Singh u long u Myntri Rangbah duh ka ri.
U bah K.P.Pangñiang haba ïakren bad ki nongthoh khubor, u la ong ba na ka bynta ban pynthymmai biang ïa ka jingdawa jylla la ka jong, la thaw biang ïa ka Co-ordination Committee hapdeng ka HSPDP bad ka GNC, ha kaba u bah K.P.Pangñiang President ka HSPDP un long u Chairman, u bah Augustine Marak General secretary, u bah Nickman Marak Vice president ka GNC kum u Co Chairman bad ki dkhot ki long u bah Norbin Marak, bah Philip Sangma, bah B.K.Budnah, bah W.Waniang bad bah S.Suting. Nalor kata la thung ruh ïa u bah Martle Mukhim kum u nongai ktien na ka liang ka HSPDP bad ïa u bah Genesingh A Sangma kum u nongaiktien na ka liang ka Garo region.
Haba kylli pat la ka sorkar India kan kohnguh ne em ïa ka jingdawa jong ki, u la ong ba kano kano ka jingdawa ka shim por ban ïoh. Hynrei katkum ki dak ki shin ba ka sorkar pdeng ka pynpaw, ka long ba ka kwah ban pynneh pynsah ïa ki riti ki dustur ka ktien ka thylliej bad ka jinglong kyrpang, katkum ki jaka ka don ka jingkyrmen ba ha kawei ka sngi kan sa urlong.
U la ong ruh ba lada ka ri Amerika ka don sanphew tylli ki jylla, kam don jingeh ïa ka ri India kaba dei ka ri synshar paitbah kaba heh tam ha ka pyrthei, ba kan pynurlong ïa ki jingdawa ban thaw jylla thymmai katkum ka ktien ka thylliej bad ka jinglong jingman jong ka synshar ka khaddar, ka riti ka dustur.
Haba kylli pat ha kaba ïadei bad u pud u sam jong ka Khasi Jaiñtia bad Garo state bad ruh ïa ki jaka bad ki shnong ki thaw ba shong ba sah da ki jaitbynriew Garo kiba hap ha West Khasi Hills, u bah Pangñiang bad u bah Augustine Marak ki la kubur lang ba ïa u pud u sam u ba la dep ppruid dak lypa yn ym pynduh hynrei kin neh kumba ka long.
U bah Marak da kaba shai u la ong ba ki jaitbynriew Garo kim don ym tang hapoh West Khasi Hills, hynrei ha Assam, Bangladesh bad kiwei kiwei ki jylla ha ri India kumta kin sah beit ha ki jaka ba ki la shong la sah baroh shi katta. Ha kajuh ka por u la ong ba ka jingkwah ban ïakhlad noh hapdeng ki Khasi Jaiñtia bad Garo, kam dei namar ba ki ïa bishni ne ki don kano kano ka jingbym ïa sngewthuh jingmut. Hynrei ka dei namar ba ka don ka jingïapher ha ka ktien ka thylliej ka riti ka dustur bad ka rukom pynïaid ha kiba bun ki bynta.
Ha kaba ïadei bad ka jingleit ban pynlong ka jingïakhih ha Delhi ba la pynlong da ka National Federation of New State (NFNS), kitei ki nongïalam ki la pynshai ba namar katei ka jingïakhih kan sdang la shisngi ka 14 tarik, kiwei pat ki kynhun kiba la ïadon lang ha ka shatri jong ka NFNS, ki la nang leit noh da ka rel naduh mynta ka sngi.
Hynrei ki kynhun kiba leit da ka airplane pat, kin mih lashai mynstep na Guwahati bad ha ka 15 tarik pat kin leit ban submit ïa ki Memorandum sha ka sorkar pdeng, ha ka por ba ka dorbar tlang jong ka Loksabha ka la sdang. ïa katei ka kynhun yn ïalam da u Professor Munish Tamang President ka NFNS u ba dei ruh u Professor ka Delhi University.