Balei slem pynmih jingpynbna tohkit CBI halor ka jingjia ha Mukroh kylli u MLA ka Mawlai

Shillong, Nohprah 11 : 20 tylli ki sngi ki la ïaid naduh ba la jia ka jingshah siat iap ki hynriew ngut ki mynsiem briew ha Mukroh ha ki pulit Assam hynrei haduh mynta ka tnad kam pohïing ka sorkar pdeng kam pat pynmih ka jingpynbna ban tohkit da ka CBI wat la hadien ba la dep kular ïa u Myntri Rangbah u Conrad K Sangma, u Symbud Myntri Rangbah bah Prestone Tynsong bad u Myntri kam pohïing u ma Lahkmen Rymbui ha ka jingïakynduh bad utei u Myntri kam pohïing ka sorkar pdeng u Amit Shah ha nongbah Delhi ha ka 24 tarik Naiwieng 2022.
Halor kane ka jingslem ban pynmih jingpynbna na ka liang u MLA ka Mawlai Constituency u bah Process T Sawkmie u la buh ka jingkylli balei bad na kaei ka daw ba haduh mynta ruh ym pat pynmih ïa kata ka jingpynbna ban aiti tohkit ïa ka jingshah siat iap ki hynriew ngut ki mynsiem briew ha ki pulit Assam kaba la jia ha ka 22 tarik Naiwieng 2022 sha ka CBI kumba la kular da u Myntri Kam Pohïing ka sorkar pdeng u Amit Shah. U la ong hato ka sorkar pdeng ka mut ban shu leh klet halor kane ka jingjia ba ka sngap jar bad shim por ban pynbna?
“ Ka sorkar pdeng ka dei ban kynmaw ba ngim lah ban klet ïa kane ka jingjia bad ngin ïai dawa ba dei ban pynmih noh ïa kata ka jingpynbna ban aiti tohkit sha ka CBI kaba dei ka tnad tohkit kaba pawnam hapoh ka ri namar dei tang lyngba ka jingtohkit jong katei ka kynhun ban paw lut ki jingshisha” ong u bah Sawkmie.
Lah ban pynkynmaw ha ka jingbud dien jong u nongthoh khubor halor katei ka jingjia la ïoh jingtip ha katei ka step 22 tarik kawei ka trok kaba kit dieng ban thang ding bad kawei ka kali maruti car kaba kit kba ki la wan kit ïa ki dieng bad u kpa na ka jaka rep ka jaka riang jongki. Hynrei haba la poi ha khappud Assam la bat ïa ki da ki pulit ka Assam haba ki khlem sangeh ki pulit ki la beh ïa ki shaduh Mukroh kaba dei ka jaka jongka Meghalaya bad hadien kane haba la sdang ïalum ki paidbah na ka shnong Mukroh ki pulit ka Assam ki sa pyndonkam da ki suloi ban siat pathar naphang kaba la wanrah ka jingiap ïa kitei ki mynsiem briew.
Halor kane ka jingjia na ka liang ki pulit Assam ki kynnoh ba ki dieng ba kit ka trok dei kiba pom na khlaw sorkar Assam, katba ki trai shnong Mukroh ki ïathuh ba dei ba kit na ka jaka jongka shnong hi ban thang ding. La ïathuh ka daw ka dei ba ki pulit Assam ki dawa pisa beit na ki nongrep bad ka jingdawa kam long tang khyndiat hynrei ka long da ki phew hajar bad ki lak tyngka kaba la buh iaki nongrep ruh ha ka jingeh kaba khraw.
Kumta dei halor kane ka nongrim ba u bah Sawkmie u la dawa ba dei ban pynbna kloi ban shimti jingtohkit da ka CBI khnang ba kin paw ki jingshisha bad u kyntu ruh ïa ka sorkar jylla ban bud dien biang ïa kane ka kam na u Amit Shah khnang ba un bthah ïaki bor ba dei peit ban pynsted ïa ka kam.