Por Congress, u PM bad Sonia ruh ki la wan ym seisoh, kane kan long kumjuh da wan ka Mamata : Bah Prestone

Shillong, Nohprah 11 : Ka Meghalaya kadei kawei na ki jylla kaba ki nongshong shnong kim patiaw satia lada wan mano mano ruh ban wan ïalap elekshon, ong u National Vice President ka N National People’s Party ha Meghalaya, Bah Prestone Tynsong.
Katei ka jingkren jong u ka long halor ka jingkylli la ka jingwan jong ka hehduh ka All India Trinamool Congress, ka Mamata Banerjee, haduh katno kan khring ïa ki paid nongthep vote ka jylla, kaban sa jied ïa ki nongmihkhmat ba thymmai ha u Rymphang – Lber jong u snem ban wan.
“Ka jingwan jong ka Myntri Rangbah ka West Bengal shane ngam ïohi ba kan don kano kano ka jingktah,” u la ong da kaba ai nuksa ruh ba ha ka por ba long Prime Minister u Dr. Manmohan Singh ba ki don ha ka Congress kam shym la don satia kano kano ka jingktah.
“Kat u Prime Minister, kat ka Sonia Gandhi ha kato ka por ki la wan ar sien lai sien na ka bynta ban kanbas elekshon ïa ka party Congress, hynrei ngam ïohi ba kan don kano kano ka jingmyntoi,” u la bynrap shuh shuh.
Shuh shuh u ong ba kane kan jia kumjuh lada wan ka Mamata Banerjee sha kane ka jylla ha ka jignwan ba arsngi jong ka naduh ka 12tarik mynta u bnai.
Da kaba batai bniah ïa kaei kaba kum uwei na ki nongmihkhmat bala jop bun sien ki elekshon, u Bah Prestone u la ong, “Kaba kham kongsan hi ka shong eh ha ngi kum ki kyrtong kumno ngi trei namar hangne ha Meghalaya jongngi ki briew kim ju jied party hynrei ki jied beit ïa u briew shimet kampher la ka party ka long kumno kumno ruh kim salia, kim ñiew kim thew.”