Ka jingjop ka la don ha kti jong ngi namar ki paidbah ka North Shillong ki angnud jingkylla: Dr Aman

Shillong, Nohprah 11: U Kyrtong jong ka UDP uban aireng na 17- North Shillong Constituency u Dr Aman War ha ka sngi Saitjaiñ u la ong ba ka jingpoi ka UDP sha ka thong ha kane ka Constituency ka la don lupa ha ka liang ka UDP namar ki paidbah jong ka North Shillong ki la angnud dikdik ban wanrah jingkylla noh ha ka constituency bad ki la dep rai lupa ha ka jingmut jong ki ban phah sha ka ïing Dorbar thaw aiñ ka jylla da u briew uba don ka jingnang jingstad bad ka jingkit khlieh ïa ki paidbah kiba u mihkhmat.
Haba kren ha ka General Meeting jong ka UDP North Shillong Circle ha Shillong Secondary School, Lawmali, u Dr Aman u la ong ba lada peit ruh na kaei kaba u sakhi ha ka jingleit rung ïing na bynta ban pan jingkyrshan ïa u ha ka elekshon MLA 2023 bad ka jingkyrshan kaba ki paidbah ki pyni ha ki jingïalang kiba u khot kum u kyrtong, u la ong ba u don ka jingsngew skhem ba ka jingjop ka la don lupa ha ka kti jong ka UDP.
“Na kaei kaba nga sakhi ïa ka jingkyrshan ha man ki jingïalang bad ha ka por ba nga rung ïing nga la ïohi lupa ba ka jingjop ka don ha ka kti ka UDP na North Shillong bad ba ka UDP ruh kan ïalam ïa ka sorkar ha u 2023,” kren sngew skhem u Dr Aman War.
U la pan jingkyrshan ruh ïa ki paidbah ba kin ym hun tang ban thep ïa ka vote ha u ha u 2023 hynrei ba kin kyrshan ïa u da kaba kin wad sa kiwei pat ki paralok kiban nang pynjop kham bun shuh shuh ïa u ha kane ka elekshon ban wan.
“Trei shitom lang bad ngi mynta ha kine ki ar bnai kiba dang sah ban ynda la dep kata kan dei sa ka pali jong nga ban trei shitom na bynta jong phi baroh ha ki san snem kiba phin pynkhamti ha nga bad nga khlei ka juban lak ba ngan trei shitom ban pynurlong ruh ïa ka jingangnud bad ka jingkhmih lynti jong phi,” u la kyntu ïa ki nongtrei ka party.
Haba kren ban pan jingkyrshan na bynta u Dr Aman War u Working President ka UDP uba dei ruh u MDC ka Jaïaw-Mawprem, u Bah Paul Lyngdoh u la ong ba ka la dei ka por ïa ki paidbah ba kin sdang noh da ka lynnong kaba thymmai ha ka pakit ka jylla hadien ba sanphew snem pura ka jingïoh ka la kynjoh ïa ka jingïoh jylla.
“Phi la pyrshang bad ka Congress hynrei kam shym la lah ban pynurlong ïa kaei kaba phi angnud,phi la pyrshang bad ka NPP ruh ka long kumjuh, phi la pyrshang ban kyrshan ïa ka BJP ruh ka jop tang arngut ki MLA hynrei mynta ailad noh ïa ka UDP bad phin ym babe,” ong u Bah Paul bad bynrap de, “Ha ka UDP ngi don ki nongïalam kiba stad, kiba trei shitom, kiba don ka jinglah bad kiba don ruh ka jingkit khlieh namarkata wat artatein shuh ban pynjop ïa ka UDP ha kane ka elekshon bad wan,” u la ong.
Ha kane ka sngi la ïoh ruh ïa ka jingkren na kiwei pat ki nongïalam ba kynthup naduh u Vice President ka UDP u Bah Allantry F Dkhar, u Bah Auguster Jyrwa, u Bah Tirot Suchen, bad kiwei de ki nongïalam kiba pan jingkyrshan na bynta u Dr Aman War.
Kine ki nongïalam ki kyntu ba kito kibym dei Khasi ruh kin ym tieng satia ban ai jingkyrshan ïa ka UDP ba ka dei ka seng riewlum namar kum ka party kan peit khlem noh shiliang khmat ïano ïano kiba dei ki nongshong shnong ka jylla la ki dei Khasi ne kim dei ruh. La sakhi ba ha kane ka jingïalang da ki bun bun ngut ki paidbah ki la wan ban shim bynta sha kane ka jingïalang ha kaba bun na ki ruh ki bym dei Khasi hynrei ryngkat ryngkat ki risa lang bad ki nongïalam, “Ha Ka Bom”.
Ha kane ka sngi ka UDP North Shillong ka la pyllait paidbah ruh ïa ka jingrwai na bynta u Dr Aman War ha ka elekshon ban wan kaba la rwai da ka Samla Bahun Marweiñ bad ka kynhun.