Nongstoiñ, Ïaïong 08: Ka seng Malang Area Development Organisation (MADO) kala ong ba u Myntri Rangbah ka jylla, u Conrad Sangma, udei ban shim jingkitkhlieh lada jia eiei ïa ki paidbah ha katei ka thaiñ.
Ki nongïalam jong ka MADO, kiba kynthup ïa u Mogin B.Marak President, Enos G.Momin Vice President, bah Sakhar Riangtem, Jedick Sangma, u Sordar barim ka shnong Huwapara, bad kiwei kiwei ki dkhot ba kynthup ïa ki longkmie bad ki nongïalam jong ka Federation of Khasi Jaiñtia & Garo People Malangkona Area Unit, haba ïakren bad u nongthoh khubor ki la ong ba ki paitbah jong kitei ki shnong kiba la shah khynñiat jubor sha ka Assam, hynrei kin ym treh ban leit da lei lei ruh bad kin sah beit ha Meghalaya lada im ne ïap ruh kam pher.
Ki nongïalam, ki la ïathuh ba ka MoU ba la ïasoi u Conrad bad u Himanta ha Delhi, ka la khynñiat jubor noh ïa ka Shnong Namtarabari, Balsrek, Garojan, Salbari, Joypur bad kiwei kiwei ki shnong shabar na ka map Meghalaya bad kane ka jingleh ka la pynbitar haduh katta katta ïa ki paitbah nongshong shnong.
U Jerdick Sangma Sordar barim ka shnong Huwapara u la ong ba ha u snem 2018 ki la shah beh krad ha ki pulit Assam bad ha kaba palat san spah ngut ki paitbah nongshong shnong ki la kylla phetwir. Nalor kata u la pynkynmaw ruh ba nalor ba ki don ki rangbah napoh shnong kiba la phet rieh sha khlaw sha btap bad kim nud shuh ban wan rung hapoh shnong, namar ki pulit Assam ki wan ban thwet ïa ki man ka miet bad hapoh khlaw ki la im kum ki mrad, ka bam ruh kim ïoh nalor kata ka jingshah dait pyrjong ka long ka bym lah ban batai. Namar tang ki jaiñ ki nep ruh kim don bad katei ka jingjia ka la kylla long ka sohkhylliang ka bym dam shuh shi lynter jingim ha ki paitbah katei ka shnong.
U Bah Mogin B.Marak u la ong ba ka ha katei ka por ba ki paitbah ka shnogn Huwapara ki la kylla phetwir. Ki nongshong shnong katei ka thaiñ ki la ïakynduh shibun ki jingeh lada ki don kam ban leit rung sha Assam, na ka bynta ki jingdonkam jong ki bad mynta lei lei haba ïa kitei ki shnong ka sorkar Meghalaya ka la ai sha ka Assam, ki jingeh ki la kham jur shuh shuh. Namar ba ki paitbah kim kwah ban leit sha Assam kumta ki pulit ka Assam ki la ïoh lad bha ban shim kabu ha kiba bun ki liang da kaba pyndik ïa ki nongñiah kali ha ka leit ka wan bad ban shim kabu ruh ïa ki paitbah ha ki rukom bapher ba pher.
U la ong ruh ba ka jingeh kaba kham hakhmat eh ka long ba ka jingkhanglad jong ki pulit Assam bad ki briew ka tnad khlaw ban khat shyiap, ban tih maw, ban thoh dieng ïap. Kane kan wanrah ïa ka jingïaklumar kaba jur namar ba ki paitbah nongshong shnong katei ka thaiñ, ki dei kiba ïatylli bha bad shisien ba don kiba pyndik ïa uwei na ki nongshong shnong baroh ki iamih lut naduh ki rangbah, ki longkmie ki samla bad ki khynnah ruh bad kim kheiñ wat ïa ka jingïap ruh.
Shisien ba ki nongsynshar shnong ne ki kynja nongïalam ki la ong ban kin leh ïa kano kano ka kam, kim salia bad lada jia ba ki pulit Assam bad ki briew ka tnad khlaw kin pyndik kumba ki la leh ha kine ki khyndiat sngi ba la dep, lada ki nongsynshar shnong bad ki riewrang bah kim lah shuh ban shah dei hangta ba ka jingïaklumar kan mih bad ka lah ban poi haduh u pud jong ka jingïaum snam.
Lada jia kan jia ha kano kano ka por u Conrad Kongal Sangma bad ka sorkar jong u ki hap ban shim ïa ka jingkitkhlieh, namar dei ma u uba la leh donbor bad u ba la shu soi matlah ïa ka soskular, khlem da twad jingmut bniah na ki nongsynshar jong ka hima Nonglang Sirdarship, ki nongsynshar jong kitei ki shnong bad ki paitbah.
U la ong ruh ba ha man ki por election baroh ki paitbah shnong kiba la khatphra snem shaneng ki thep vote ha Merghalaya, hynrei mynta la khynñiat ïa ki sha Assam bad ha u snem ban wan ka election ka la poi ki paitbah kin leh kumno, namar ha Assam te kin ym treh dalei lei hato ki ar hajar tam ki paitbah kin duh noh ïa ka hok jong ki ban thep vote. Ha kane ka erlection ban wan kaba long ha u 2023 ki paitbah ki la thikna ba kin duh ban thep vote, namar haduh ban da ïap ba kin ym pynrung kyrteng ha ka electoral roll jong ka Assam.
