Kynnoh ba khang ki Pulit Assam ïa ki paidbah ban wan ïew ha Mawlasnai

Nongpoh, Ïaïong 08: Hapdeng ka jingïakynduh ki bor synshar Ribhoi District bad ki bor District jong ka West Karbi Aanglong ban ïakren halor ka jingjia ba dang shen ha Jatalong, ki paidbah Khasi ki la ïathuh ba ki Pulit Assam ki la pynduk ïa ki paidbah kiba thmu ban wan ïew na Sabuda sha Mawlasnai.
Ki paidbah ki la ïathuh ba barabor ki ju wan ïew sha Mawlasnai haba die ka sngi ïew ban wan thied wan pet, hynrei mynta ka sngi, ki Pulit Assam, kim shyn la shah satia ïa ki ban wan. Ka Sabuda kadei kawei na ki Shnong ba hap ha ka Block II.
Haba la kylli na u DC Ribhoi, u Arpit Upadhyaya, u la ïathuh ba um shym la ïoh jingujor eiei halor kane da ka jingthoh ne da ka Ktien, hynrei wat la katta ruh un sa ïakren bad u DC ka West Karbi Aanglong, lada don kaba kum kane ka jingjia. “Ki Pulit kim lah ban pynthut ne khang ïa ki paidbah haba ki wan ïew wan hat ha ki shnong khappud jong ka Meghalaya bad Assam”, la ong u DC.
U DC u la ïathuh ruh ba hadien ka jingjia ha Jatalong, ki artylli ki District, ki la pynlong ka jingïakynduh ha Sabuda ha ka sngi thohdieng, ban ïakren ïa ka jingïashongsuk shongshngaiñ ha katei ka thaiñ, da kaba teh lakam ïa ka jingrung jingmih ki paidbah ha kane ka Shnong, khnang ba kan nym don kano ka jingïakynshoit pher jaidbynriew ha kane ka Shnong.
U la ong ruh ha kawei ka bynta ka jingthmu kane ka jingïakynduh lang ki bor district na Ri Bhoi bad na Karbi Anglong ka dei shi bynta ba kum ki bor district ki hap ban ïa peitngor ban nym shah ktah ki paidbah na ka jingjia kaba la jia dang shen ha ka shnong Jatalong bad ha katei ka jingïakynduh lang ki la shim ruh ka rai ban ïa trei lang na ka bynta ban pynneh ïa ka shongsuk shongsain ki paidbah ka thain Block II, kaba dei ka jaka ba dang ïa kajia pud hapdeng ka Meghalaya bad ka Assam.
Haba ïa kynduh lang ruh ha katei ka sngi na ka liang ka bor synshar district na Ri Bhoi la ïalam da u Bah M.B Tongper, Additional Deputy Commissioner ka Ri Bhoi bad kynthup ruh ki heh pulit bad ki heh ophisar na ka District bad na ka liang ka West Karbi Anglong ruh la wan ban mihkhmat da ki ADC bad ki heh pulit ban ïa kren halor ka jingdonkam ban pynneh ïa ka shongsuk shongsain ki paidbah.
Shuh shuh, u la pyntip ruh ka rai kaba la ïa shim ha katei ka sngi ka long ba na baroh ar tylli ki District kin shim ïa ka jingkitkhlieh ban peitngor ba nym mih kino kino ki huri hura kiba ktah ïa ka shongsuk shongsain ki paidbah bad ha kajuh ka por ruh ba tehpyrkhing ïa ka rung ka mih ki briew kiba nabar kiba lah ban mih ka jinghuri hura b akum ka bor district ki la peitngor bha.