Nongstoiñ, Nohprah, 7: Ka Proseshon Eucharist kaba la pynbeit da ka Nongstoiñ Diocese, kan long ha ka 11 tarik mynta u bnai ha New Nongstoiñ. Ha u kyrwoh ba la phah mynta ka sngi da u bah Nerius Syiemlieh Chairman ka Organising Committee Divine Saviour Parish Nonbah, la ong ba ha katei ka jingïaseng Proseshon Eukharist u Rev Fr Anselm Nonglang Administrator jong ka Nongstoiñ Diocese, un long u kongsan bad u nongkñia ba rangbah ha ka Mass Bakhuid.
La ong ruh ba ha katei ka jingïaseng yn pdiang kylluid ïa baroh ki parabangeit kiba kwah ban wan. Ka jaka ban pynlong ïa ka jingïaseng kan long ha ka jaka ba don ka Ïingmane kyntang bah bad yn buh ruh da ki giant screen, khnang ba baroh kiba wan ha katei ka jingïaseng kin ïohi. La ong ruh ba ka jingrwai step kan sdang ha ka por 9.30 bad ka Mass Bakhuid kan sdang ha ka por 10 baje.
Ka Organizing Committee ka la bthah ïa baroh kiba wan jingïaseng ba kito kiba sah hajan jong ka Ïingmane, ba kim dei ban wanrah kali khnang ban lait na ka jingkhapngiah. Nangta ki jaka pynïeng kali na ka bynta ki kali jong ki Lyngdoh (Phadar), ki sister bad ki Invitees kiba wan na jngai, kin sangeh ha phyllaw jong ka St.Joseph ha Tiehsaw, ki kali kiba wan na Nongkhlaw, Mairang, Kynshi, Markasa, Mawthong, Shillong Archdiocese bad Jowai Diocese kin ïeng ha New Nongstoiñ Market Complex, Mandiwat steshon Shillong bad shilynter ka rud surok naduh Petrol pump haduh khmat Ïingmane Presbyterian New Nongstoiñ.
Ki kali kiba wan na Nonghyllam, Munai, Mawkyrwat, Mawpat, Rangblang kin ieng ha shilynter ka surok naduh jan jingkieng bah Khrik Lyngkhoi, haduh ka jaka jong ka Kongheh Mil Nongrum sha surok IB PWD bad naduh Nonbah haduh lad jong ka ophis jong u Syiem ka hima Nongstoiñ bad haduh stand taxi Pyndengrei.
Ki kali kiba wan na Shallang, Umdang, Umwahlang, Sonapahar, Nongjri, Riangdim, Mawlangdep bad Mawkhlam, kin ieng naduh stand taxi Civil haduh khlieh ïew Nongstoiñ, na pyrshah ka skul Lyngngam ter ter haduh ophis jong ka Soil.
Ki kali kba wan na ki thaiñ Rambrai haduh Mawrusyiar kin ïeng ha madan phutbol Tiehsaw ter ter haduh St Joseph Hospital. Ki kali kiba wan na ki thaiñ Pyndengrei kin ïeng ha surok ban leit sha ophis DC ter ter haduh lad ban leit sha Mawïong Pyndengrei.
Ha katei ka sngi, ka jingïaid Proseshon kan sdang ha ka por 1 baje bad ka rukom ïaid kan sdang kumne da ka kynhun ki khynnah duwan bad ka diengphna hajan skul bah Edren bud sa ka St Peter’s Band, Parish Nonghyllam, Parish Munai, Parish Riangdim Parish Shallang, Parish Maweit Parish Nongjri Parish Umdang Parish, Mawpat Parish Nongkhlaw, Parish Mawkyrwat, Parish Sonapahar bad Parish Mawthong.
Ha katei ka sngi kin don ruh ki dukan sha bad dukan ja ha khlieh ïew, ha lad skul St Xavier, ha Nonbah jaka ïeng taxi kamai, ha Shiliang Nonbah, harud surok Mawkyrwat, ha madan Mandiwat steshon Shillong bad hajan Market Complex New Nongstoiñ.
La pyntip ruh ba ha katei ka sngi yn ym shah ïano ïano ban die ïa ki kynja jingbam, ki tiar, ne ki dur naduh ophis District Council haduh ïimgmane bad naduh Children park haduh ïingmane. Kumjuh ruh ym shah ban die jingdie ha shilynter ka surok ba ïaid proseshon. Nalor kata ka Organsing Committee ka la kyrpad jur ïa baroh ki kali kiba wan sha katei ka jingïaseng proseshon, ba kim dei ban pynblock ha surok hynrei kin ïaid beit tang na ka lain kaba ki dei ban ïaid, khnang ba kan ym pynthut ïa ki para bangeit kiba leit sha ka jingïaseng kynthei jong ka KJP Synod Synod Sepngi ka ban long ha ka Balang Presbyterian Mawliehdeiñ.
