Nongstoiñ, Nohprah, 7: Ka kynhun seng thymmai jong ki nongñiah kali kamai hapoh ka shatri ba la tip kum ka Nongstoiñ Tourist Taxi 5 Seater Driver and Owner Association, kiba dei ki kali kiba mih na sor Shallang sha sor Shillong, na Riangdo sha sor Shillong, na Langpih sha sor Shillong bad kiba mih na sor Nongstoiñ sha sor Shillong, hadien ka jingkyrpad jong ki paidbah kumta ka la I donkam ban buh noh la ka jong ka jaka pynïeng kali ne jaka ap kali ha sor shillong bad ha sor Nongstoiñ.
Kumta katei ka kynhun mynta ka kynti ka la lah ban pynurlong ïa katei ka jingangnud jong ki paidbah, da kaba pynlong jaka ïeng Kali noh ha them bijoy kawei na ki jaka kaba marjan bad ka Khyndailad.
La ong ba katei ka jaka ïeng kali ha them bijoy, la sdang ban pyntreikam noh shait shait naduh mynta ka sngi 7 tarik u Nohprah 2022. Kumta ka kynhun ka ïawer ïa ki paidbah kiba donkam ba wan sha katei ka jaka ap kali kat kiba kwah ban shong ha kitei ki kali kamai kiba dei ruh kiba tang kiba 5 seat.
Ym tang katta hynrei ki paidbah kiba kiew na sor Nongstoiñ sha sor Shillong ruh, ki lah ban leit wat kali na khlieh ïew jong ka ïew Nongstoiñ naduh mynta ka kynti, ïa kaba ka kynhun ka la pynlong kum ka jaka ïeng ne ap kali na ka bynta ki paidbah jong ka thaiñ.
Ïa katei ka jingpyntip la pynbna lyngba u bah Donborius Khardewsaw President ka Nongstoiñ Tourist Taxi 5 Seater Driver and Owner Association. Kitei ki jaka ap kali kiba thymmai kiba ha sor Nongstoiñ bad sor Shillong, ki dei tang kiba shu pynlong thymmai. Hynrei kiba rim pat ki dang don hi kumjuh kumba ju long, kumta ki paidbah jong ka thaiñ kim dei ban sngewthuh bakla, pynban ka dei tang ban kham pynsuk ïa ki paidbah.
