Shillong, Nohprah 06: Ka United Democratic Party (UDP) ha ka sngi Ba-ar ka la pynbna ïa ki kyrtong jong ki 32 ngut ki kyrtong jong ka thup ba nyngkong kiban aireng ïa ka elekshon MLA jong u snem 2023.
Ki 32 ngut ki kyrtong kiba ka UDP ka pynbna ka long hadien ba ka State Election Committee ka UDP ki la ai jingmynjur ba kin ïoh ïa ka tiket ban ïakhun ïa ka elekshon ha u 2023.
Kine ki kyrtong kiba ka UDP ka pynbna ki kynthup lai ngut ki MLA kiba long ruh ki myntri ha ka MDA kata u Bah Kyrmen Shylla (Khliehriat), Bah Lahkmen Rymbui (Amlarem), Bah Brolding Nongsiej (Mawthadraishan) bad ki lai ngut ki MLA ba kynthup ïa u Bah Nujorki Sungoh (Mookaïaw), Bah Balajied Kupar Synrem (Shella), u Bah Pius Marwein (Ranikor) bad kumjuh ïa u Lam Phang ka Ïing Dorbar Thawaiñ u Bah Metbah Lyngdoh (Mairang).
Ka UDP ka la pynbna ruh ïa ki san ngut ki MDC ba kynthup ïa u CEM ka KHADC u Bah Titosstarwell Chyne (Sohra), Bah Paul Lyngdoh (West Shillong), Bah Mitchel Wankhar (Mylliem), u Bah Dawan Lyngdoh (Nartiang) bad u Bah Treilang Suchiang (Raliang) nangta u CEM barim ka JHADC u Bah Moonlight Pariat (Jowai).
Ha kane ka thup ba nyngkong ki don ruh saw ngut ki MLA barim kiba kynthup ïa u Bah HDR Lyngdoh (Sohiong), Dr Jemino Mawthoh (Nongthymmai), u Luderberth Ch Momin (Kharkutta) bad u Bah Remington Pyngrope (Mawkynrew).
Shuh shuh ha kane ka thup ki don arnhut ki doctor MBBS ba kynthup ïa u Director of Health Services (DHS) barim ka jylla u Dr Aman War (North Shillong) bad u Dr Osaphi Smithson Jyrwa (Mawryngkneng).
Ki don ruh arngut laingut ki ophisar ba la shongthait kiba la mih kyrteng ha ka thup ba nyngkong kata u Executive Engineer PWD u Bah Baïahunang Makdoh (Mawhati), u Assistant Director, Agriculture u Bah Olan Singh Suiñ (Mawsynram) bad u ex-service u Taposh D Marak (Resubelpara).
shuh shuh kiba ka UDP ka pynbna ha kane ka thup ki kynthup ïa u Bah Anthony Khongwang (Pynursla), u Rakkam Ch Marak (Bajengdoba), u Bah Badhok Nongmalieh (Jirang), u Bah Sunshine Makri (Umsning), Bah Polestar Nongsiej (Nongstoin), u Subroto G Marak (Mendipathar), u Andreash G Momin (Rongjeng), u Ronald Rikman Sangma (Salmanpara), u Kennethson R Sangma (Dalu) bad u Ashahel D Shira (Rajabala).
Lah ban ïohi ba kiba bun na ki nongkitkam kiba ha khmat jong ka UDP ki la mih kyrteng kum ki kyrtong ha kane ka thup ba nyngkong lait noh u Bah Bindo M Lanong uba dei uwei napdeng ki nongseng ka party bad uba la pan tiket ban ïakhun ïa ka elekshon na Nongkrem hynrei namar ka jingthmu u MLA ba mynta ka Nongkrem u Bah Lambor Malngiang ban pynïasoh sha ka UDP bad ban pan tiket ruh na ka liang ka UDP lah ban sngewthuh ba kan pynduh tiket noh ïa u Bah Bindo ban ai pat sha u Bah Lambor.
Haba kren ha kane ka sngi, u Bah Metbah Lyngdoh u ola ong ba kat shaba leit ba wan ka khana kaba ki paidbah ki ïakren bha ka long ïa ka jingdonkam ïa ka seng saiñ pyrthei riewlum na ka jylla ba kan shimti noh ïa u lakam synshar na ka kti ki National party namar dei tang ka seng riewlum kaba lah ban synshar ïa ka jylla kat kum ka jingkwah bad ka jingangnud ki nongshong shnong ka jylla.
“Nga sngewthuh shai ba ka don jaka ïa ki seng riewlum jong ka jylla ba thaw sorkar namar dei tang ka seng riewlum kaban lah ban pynurlong ïa ka thong bad ka jingangnud kaba ki paidbah ki kwah la slem ki ban ïohi namar kine ki National Party kim lah ban pynurlong satia ïa kane bad ruh namar ki don ki high comand kaba khynrwait shabi ïa ki,” u la ong.
Shuh shuh u la ong ba naduh ki snem kiba ngi ïoh la ka jong ka jylla kham bunsien hi kiba ïoh ban synshar ïa ka jylla ki dei beit ki national party ym kum kiwei pat ki jylla kiba ki paidbah ki ailad ïa ki seng riewlum ba kin bat ïa u lakam synshar kum ha Mizoram, Nagaland, bad ha Sikkim bad u la ong ruh ba ha ka jylla kaba lah ban shim ïa u lakam synshar ka dei beit tang ka UDP kaba u Bah EK Mawlong u la seng nongrim.
“Ngi kyrmen skhem ba ha u 2023 ki paidbah ka jylla kin pynjop kham shibun ngut ki MLA namar kumba long mynta ki kwah ruh ïa ka seng riewlum ba kan synshar ïa ka jylla bad kyrmen ha ka vote ruh kin pyni ïa kata,” u la bynrap.
