Mih ki jingkynthoh ba thmu ai wai ha u riewshimet khlem da khot Tender

Bun kiba kwan ban pynïaid ïa ka IB PWD ha Nongstoiñ

0

Nongstoiñ, Nohprah 6: Ka Inspection Bungalow jong ka tnad PWD ® kaba don ha Nongstoiñ, hadien ba la pynbha bad pynbit pynbiang ka la long ka jaka kaba la khring bad kaba itynnad tam napdeng ki IB ha Nongstoiñ. Hadien ba la pynbha bad pynlut ruh kumba 5 klur duna ei ei, u Bah Prestone Tynsong Deputy Chief Minister ka sorkar Jylla, u la hiar hi dalade ha ka 17 tarik u bnai ba la lah ban plie syndon ïa ka.
Hynrei, ha kine ki sngi ki la sdang mih ki jingkynthoh bad jingkynnoh ba bun jait ïa katei ka IB, ka la don ka jingthmu sop sop ban shu aiti ha u riew shimet kiba don syndah bad don jingïadei ba jan bha bad ki ‘lei san snem, khlem da ïaid da ki lynti lane ki kyndon treikam ba shong aiñ.
Ki katto katne ki riew rangbah ha sor Nongstoiñ ki bym kwah ban pynpaw kyrteng ïalade, ki la kynnoh ba katkum ka jingtip ba ki ïoh, la ong ba la thmu ban shu ai ha u riew shimet ba un pynïaid ïa katei ka IB, khlem da khot tender paidbah kumba ka dei ban long. Ki la kynnoh ruh ba kane ka kam ka la poi ruh sha ki heh ki haiñ jong ka PWD shaduh Shillong, imat wat ha ka miej Minister ruh bad kaba sah ka long ban shu mynjur noh lyngba ki kot ki sla.
La kynnoh ruh ba katkum ka jingïoh jingtip malu mala, la ong ba yn ai wai ha ka dor kaba tang 20 hajar shi bnai. Ka jingkylli ba ki buh ka long lada la pynlut 5 klur ban shna bad pynbit pynbiang ïa ka, hato katno snem ka PWD ka mut ban ai wai bad tad haduh lano yn lah ban pynmih ïa ka jinglut haba thmu ai wai 20 hajar tyngka. Hato mano ba shna bad ba mang ïa kane ka IB, ka PWD ne Revenue ï. Ka jingkwah jong ki paidbah Nongstoiñ hi ka long ba dei ban khot da ka beit da ka ‘Legal Tender Bidding System’, ki la ong.
Ki la buh jingkylli ba hato ka mut aiu kane ka rukom leh ban shu lilam lut ïa ki building bad ki jingdon jingem jong ka sorkar ha ki riew shimet. Kane ka sorkar ka dei kaba shu lilam lut ïa kiei kiei baroh naduh ka MeECL bad kiwei kiwei, ki la kynnoh.
Halor kine ki jingkynthoh bad jingkynnoh da ki riew paidbah ka sor Nongstoiñ, u nongthoh khubor haba kylli na u Superintending Engineer ka tnad PWD ® Bah J.Lakiang ban tip ïa ka jingshisha, hynrei ka jubab kam da long kaba shai bha. Tangba u Bah Lakiang u la ong, “Ngam shym pat la ïoh jingtip haduh mynta ba ka la don kata ka jingthmu ban ai lane phah pynïaid hano hano, namar ha ka jingshisha te na ka liang ka tnad ka dang pynkhreh shait shait ïa ki jingdonkam ban pynïaid ïa kane ka IB”.
U la ong ruh, “Lada dei ban ai hano hano ruh ngin hap ban ïaid da ka lynti kaba dei kaba shong aiñ bad ka ban ai jinghun ïa baroh. Lehse lada ka la don kata ka rukom treikam thymmai (system) ha kaba lah ban shu ai ha uno uno ruh. Hynrei dei ban ïaid hi da ki lynti kiba shong aiñ, ym ban shu shim shu pynïaid hi da mano re mano”.

Leave A Reply

Your email address will not be published.