Shillong, Naiwieng 27 : ïa ka 26 tarik Naiwieng la rakhe man la u snem kum ka Sngi jongka Riti Synshar jongka Ri India namar dei ha ka 26 tarik Naiwieng 1949 ba ka Constituency Assembly ka la ithuh ïa ka Riti Synshar jongka ri India bad ïakane ka sngi la tip ruh kum ka Samvidhan Divas.
Mynta u snem ka sorkar ka la rakhe ïa kane ka sngi ha Raj Bhavan, Shillong ha kaba ki ophisar ka sorkar bad ki nongtrei ka Raj Bhavan ki la ïalum lang hakhmat ka Raj Bhavan bad bam smai ruh da kaba pule ïa ka Preamble jongka Riti Synshar ka ri ba la lam khmat da u Chief Secretary bah D.P Wahlang.
Dei ha u snem 2015 ba u Myntri Rangbah duh ka ri u Narendra Modi ula rai ban rakhe ïa ka 26 tarik Naiwieng kum ka Sngi jongka Riti Synshar ka ri bad ïa kane ula pynbna ha ka por ba buh maw nongrim ïa u Dr B.R Ambedkar Statue of Equality Memorial ha Mumbai namar ïa une u riew khraw la tip kum u kpa jongka Riti Synshar ka ri India.
Ka jingthmu jongka jingrakhe kam long tang ban kynmaw burom ïa une u kpa ka Riti Synshar ka ri hynrei ka long ruh ban pynkynmaw ïa ki nongshong shnong ban burom ïa kiei kiba la pruid dak ha ka Riti Synshar ka ri bad kumjuh ruh ban ïai pynthikna ban bud ïa ki nongrim kiba la pruid dak ha kane ka Riti Synhar jongka ri India.
