Ngim don nongïalam shuh ha ka jaidbynriew kiba kynsai kum ha ki snem ba mynshuwa: VGK Kynta

Shillong, Naiwieng 27: U Nongsaid aiñ ba la rangbah bha ha kane ka kam bad u khraw pyrkhat ka jaidbynriew u Bah VGK Kynta u la ong ba ki nongïalam ka jaidbynriew jong ngi mynta kim long shuh kum ha ki snem kiba kham mynshwa ha kaba haba dawa ki kam kum ki nongïalam ban shim ingkit khlieh ki kloi ban shim khlem jinglehraiñ.
Haba ïa kren bad u Mawphor u la ong ba ka jingpyneh jong u Bah Lahkmen Rymbui ban hiar shuki wat la ka don ka jingbym lah ban ai jingshgaiñ bad jingïada ïa ki nongshong shnongkhappud bad ka jingbym treh jong u ban hiar shuki bad ban shim jingkit khlieh wat hadien ba ka jingjia ha Mukroh ka pyni shai ba um don ka rynïeng rynïot kum u nongïalam kum ha ki snem kiba mynsuwa.
“Lada u Myntri kam poh ïing u Bah Lahkmen u hiar shuki kum u kum ka jingshim jingkit khlieh ïa kaei kaba la jia ha Mukroh un ym rem ilekshon satia hynrei un ïai jop lada dei ba u la trei bha kum u MLA ka thaiñ ba u la mih khmat katba u dang ïakhun ïa ka ilekhshon,” u la ong.
U la ong ruh ba ka jinglong ka jaidbynriew mynta ka don hapdeng ka jingbym don shuh ki nongïalam kiba kynsai kum ha ki por kiba mynshuwa.
“Ki nongïalam kum ha ki por ba ngi ïakhih ïoh jylla kim don shuh ha kane ka juk ba ngi im namar ha kato ki por ki nongïalam kim dei ki nongïalam kiba bat ïa ka nongrim bad kibym ju riej ruh ban ïeng ha ka jingshisha ym kum ha kine ki sngi kiba mynta,” u la kren bynñiaw
Haba kylli halor ka jingïakhih kaba la pur ha ki bynta ka rilum Khasi halor ka jingjia ha Mukroh, u la ong ba ong ba ka jaidbynriew jong ngi ka dei ka jaidbynriew kaba pjah kloi ïa kino kino kino ki jingïakhun khlem pat kynjoh satia sha ka thong jong ka jingïakhun.
“Ngi dei ka jaidbynriew kaba pjah kloi bha, peit kat ka jingïakhih khohreh ban ïakhih halor ka jingshah siat ïap u Bah Cheristerfield Thangkhiew ka shu kut kumto, kane ka jingïakhih mynta ruh lehse tang hadien ar taiew ki lah ban shuh pjah la ka pjah noh ne jah klep kumto khlem pat poi sha ka thong ba ngi ïakhun” bad bynrap, “Kum ka jaidbynriew ngim ju don ka jingaiti lut bad ka jingkut jingmut ha kino kino ki jingïakhih ba ngi dawa namar ngi sngew tynnad tang ban ïalum paidbah bad ban ïakren shongshit ban ban shoh dkhar katba ïa ka thong kaba ngi dawa pat ngi klet noh ha ka jingshongshit shoh dkhar bad tahw jingkulmar,” u la ong.
Shuh shuh u la ong ruh ba ka jingïakhih ba tang da ka jingsngew khlem ka jingstad bad ka jingsngewthuh ka dei kawei na ki daw ba ngim ju jop ha ka jingïakhun.
“Phin peit bha ïa ka jingïakhih ruh bunsien ngi ïakhih beit da ka jingsngew bad ka rukom ïakhih ruh ka dei beit ka thang kali bad ka jingwanrah jingkulmar bad ka kut noh tang katta ruh,” u la bynrap shuh shuh.
Haba kren halor ka jinglong jingman pat jong ka jaidbynriew u la ong ba kawei na ka jingtlot kaba khraw ka jaidbynriew ka dei ka jingkhalaiñ palat ka jingsngew para niam bad ka jingnoh mon sha ki briew kiba pynbam nohkot ha ka jingjied nongïalam.
“Lada peit na kaba long mynta nga ïohi ka jingiduh jingkyrmen ïa ka jaidbynriew bad ka lawei hi ka dei ka lawei kaba ngin ym sngewtynnad bad kaba dum jong ka jaidbynriew,” u la ong.