Mynta yn ïa kynduh ki 2 CM, Dy CM bad ki myntri ïa u Amit Shah

Shillong, Naiwieng 23 : Ka sorkar jylla ka la rai ban pan jingïarap pisa na ka sorkar pdeng na ka bynta ban buh ïa ki Police Station bad ki Police Outpost ha kito ki jaka ba jur ka jingïakajia bad ba jur ka jingwan pyndik ki pulit Assam ïa ki paidbah.
Haba kren ha ki lad pathai khubor u Symbud Myntri Rangbah ka jylla u bah Pretone Tynsong u la ïathuh ba u Myntri Rangbah ka jylla u Conrad K Sangma un ïa lam ïa ka kynhun myntri lashai ka sngi ban ïa kynduh ïa u Myntri Kam Pohïing ka sorkar pdeng u Amit Shah na ka bynta ban ïathuh lut ha u ïa kaei kaba la jia kaba la wanrah ka jingduh ei ïa ki san ngut ki mynsiem briew na ka jingshah siat iap ha ki pulit jongka Assam.
“ Lashai ka sngi ngin sa ïakren sani bha bad u Myntri kam pohïing ka sorkar pdeng ban kyrpad ïa u ban ai jingiarap pisa ïaka jylla ban ïoh buh ïaki Police Station bad Out Post ha kito ki jaka ba jur ka jingshah pynthut ki paidbah ha ki pulit Assam kata ha shilynter ki bynta khappud ka Meghalaya bad Assam” ong u Symbud Myntri Rangbah.
Ka sorkar ka la shim ïa kane ka rai hadien kane ka jingshah siat iap ki san ngut ki mynsiem briew ha ka shnong Mukroh, West Jaintia Hills ha ka 22.11.22.
Hadien ka jingwan sngewlem ïa kito ki longïing kiba la ïa kynduh ïa kane ka jingjia ba sngewsih u bah Prestone u la ïathuh, ha ka jingshisha ka sorkar ka la dep rai ban buh ïa ka Police Out Post ha Barato hynrei hadien ka jingïakynduh ïa ki bor synshar shnong mynta ka sngi ki la dawa ba dei ban buh ha ka shnong Mukroh kumta ka sorkar kan sa shong pyrkhat halor kane ka kam.
U Symbud Myntri Rangbah u la ïathuh ba yn sa ïa kren ruh bad u Amit Shah ba un bthah ïa baroh ar ki sorkar jylla ban ïatrei lang ban wanrah ka jinshong suk shongsaiñ ha khappud bad ba kum kine ki jingjia kim dei shuh ban dang jia bad ba ki paid khappud kim dei ban shah pynwit bad pyndik bad thombor ha ki pulit Assam ne Meghalaya ruh.
U la ïathuh ba ka sorkar ka la rai ruh ban pynkhlaiñ ïaki bor pulit ha khappud khnang ban wanrah ïa ka jingshongsuk shonsaiñ. Ka sorkar ka la bthah ïa u CS bad u DGP ba kin ïai ïakren bad bud dien bad ka sorkar Assam ban peit ba kan ym mih shuh kano kano ka jingshah pynshong syier ki paid khappud khamtam ha kaba ïadei bad ka leit ka wan ki briew na Shillong sha Guwahati bad na Guwahati sha Shillong ne kiwei ki jaka ka dei ban long kaba shngaiñ.
U Symbud Myntri Rangbah u la kyntu ruh ïa baroh ki paid nongshong shnong ba kim dei ban wanrah ka jingsngew ïapher jaidbynriew na kane ka jingjia namar kane kam don jingïadei haei haei ruh bad ka dei kaba la leh thombor beit da ki pulit ka Assam. “ Ngi donkam ban ïa imsuk im saiñ la ka dei ha Assam ne Meghalaya ruh bad halor kane ruh ngin sa ïakren bad u Myntri kam pohïing ka sorkar pdeng lashai hi ka sngi ba ka sorkar pdeng ruh kan shim khia ban wanrah ïaka jinshongsuk shongsaiñ hapdeng ki ar jylla” ong u Symbud Myntri Rangbah.
U la ïathuh ba la nang pynkhlaiñ ruh ïa ka jingïaid pahara ki pulit khamtam hadien ka jingjia shah thang kawei ka kali Assam ha Jhalupara hynnin ka miet.
“ Ngi la shong bishar bniah bha ia ka jinglong jingman ka shongsuk shongsaiñ bad ki don ki jingjia kiba rit ba ria ha kane ka nongbah bad shabar kane ka nongbah ruh bad ngi la rai ban pynkhlaiñ shuh shuh ïa ki bor pahara khnang ba ki riew shim kabu kin ym ïoh lad ban pynthut ïa ka suk ka saiñ” ong u Symbud Myntri Rangbah.