Da ka NCM pynbna ki Seng ha ka sngi Thohdieng, kyrpad ïa ki nongtrei sorkar ban pep trei

Shillong, Naiwieng, 23: San tylli ki sengbhalang kiba kynthup ïa ka KSU, FKJGP, RBYF, JSU bad HNYF ha ka sngi Balang ki la rai ban pynlong da ka jingïashong kyllaiñ myngngor ha ka sngi Palei bad pynbna ban pynlong da ka Non-Cooperation Movement (NCM) ha ka jylla baroh kawei ha ka 25 tarik mynta u bnai ban pynbor ïa ka Sorkar Jylla ba kan pynshitom mardor ïa ki Pulit ka Jylla Assam kiba donkti ban siat ïap ïa ki paidbah ha ka shnong Mukroh, West Jaiñtia Hills District.
Ha ka jingïakren bad ki lad pathai khubor, u President ka FKJGP u Bah Dundee C. Khongsit u la ong, “ngi la rai ban pynlong ïa ki jingïakhih kiba jaijai kum ka jingpynrem halor ka jingshah siat ïap ki san ngut ki briew ha ki Pulit Assam.”
U la ong ba ka jingshong kyllaiñ mynngor kan sa long hakhmat u durmot jong u Kiang Nangbah hajan Shillong Civil Hospital ha ka sngi Palei. Hadien kane, yn sa pynbud pat da ka jingthang mombati kum ka jingsngewlem ïa ki san ngut ki lanot kiba la duhei ïa la ka jingim bad kum ka jingsngewlem ïa ki bahaing hasem jong ki lanot.
“Ngi dawa tyngeh ïa ka Sorkar Jylla ba kan pynïoh ïa ka hok jong ki lanot,” ong u Bah Khongsit.
U President ka FKJGP shuh shuh u la kyrpad ïa ki nongtrei sorkar ban ïashim bynta lang ha ka non-cooperation movement ka ban sa long ha ka jylla baroh kawei ha ka 25 tarik mynta u bnai.
“Kane ka dei ka khubor kaba shai ba ka ka por ka ladei ïa ka Sorkar Jylla ba kan shimkhia ïa ka jingjia ha ka shnong Mukroh namarba kane kam dei shuh ka sien ka banyngkong ba ki paidbah nongshong shnong ka jylla kiba sah ha khappud kin mad ïa ka jingshah pyndik ha ki Pulit ka Jylla Assam,” u la ong.
“Ngi la sakhi kum kine kijuh ki jingjia ha u snem 2010 ha ka shnong Langpih bad haduh mynta ki lanot kim shym la ïoh ïa ka hok bad dei namarkata ngi dawa na ka Sorkar Meghalaya ba ka dei ban kham pyni ïa ka bor ka iktiar halor ka jingjia ha ka shnong Mukroh da kaba rah sha ka Sorkar Pdeng bad ban dawa ïa ka Sorkar Assam ba kan aiti ïa ki Pulit kiba donkti ha ka jingsiat ïap ïa ki san ngut ki riewpaidbah,” u la bynrap.