Thaw da ka Border Battalion lane ai suloi noh ïa ki paid khappud ban ïada: Banteidor

Shillong, Naiwieng 23 : U Nongialam ka PDF uba long ruh u Myntri ka sorkar jylla uba peit ïa ka tnad sport bad Youth Affairs bad ïa ka Agriculture u bah Banteidor Lyngdoh lem bad kiwei ki nongïalam ka Party mynta ka sngi ki la hiar sha ka shnong Mukroh ban leit sngewlem ïa ki long ïing kiba la ïa kynduh ïa ka jingjia ba sngewsih da ka jingduh noh ïa kiba ieit ba thoiñ jongki na ka daw ka jingshah siat iap pathar ha ki pulit Assam. Ha kane ka sngi u bah Banteidor la ïoh sngew da la ki jong ki shkor ïa ka jingud jingnam jong ki paidbah halor ki jingeh ba ki ia kynduh na ka jingwan pyndik bad thombor ki pulit Assam na ka por sha ka por hapoh shnong poh thaw.
Kumta na ka liang jongu u la ong ba ka sorkar ka dei ban thaw noh da ka Border Battalion ban phah pahara ha khappud ne ïa mynta mar mar pat dei ban phah shwa da ki SF-10 ban pahara khnang ba ki pulit Assam kin ym nud shuh ban thombor. U la ong ïa kane namar hynnin ka sngi ki don ki pulit Meghalaya ha katei ka jaka ba jia ka jingthombor ki pulit Assam hynrei mar ïa riew kuli daiñ bad daiñ na ki pulit Assam kine ki phet rieh pynban sha khlaw. Nalor kane u la ong lada ka sorkar hi kam lah ban buh da ka Battalion ba kyrpang bad phah pahara da ki SF 10 lah dei ka por ban ai jinghikai pyntbit ïa ki paid khappud bad ai ïa ki da ki suloi ba kin ïada hi ïa lade na ka jingshah thombor ha ki pulit Assam.
Ha kane ka jingleit sngewlem la ïadon lang u President ka PDF bah Gevin Mylliemngap MLA ka Sohra, bah Egenstar Kurkalang Working President, Dr Amada Pakyntein i kurim jong u bah Banteidor lem bad kiwei kiwei ki nongïalam. Kine ki la ïoh ban leit ïa kynduh bad ai ka jingsngewlem ïa baroh ki long ïing kiba la ïa kynduh ïa ka jingjia ba sngewsih. Nalor kane na ka liang jong ka PDF ka la pynnoh jingïarap ruh sha ki long ïing longsem kiba ngat ha kane ka apot.
Shwa ïa kane ki la leit ruh ban jngoh da la ki jong ki khmat ïa ka jaka ba la jia ka jingshah siat iap bad ki la lap ba kane ka jaka ka hap hapoh u pud u sam ka Meghalaya. U bah Banteidor u la ong kane ka shnong Mukroh ka dei kaba dang hap hapoh ka Meghalaya bad hap ha ka Elaka Shilliang Myntang. U la ong “ Nga dawa ba ka sorkar kan buh ïa ka Police Outpost ha Mukroh ym ha Barato namar kiba shah thombor ki dei ki paid khappud ha Mukroh. Kane ka jingshah thombor ki paidbah na ka por sha ka por ka la pynbitar da shisha namar ki pulit Assam kim suidñiew ïa kaei ka jingïakren ïa pynbeit na ka por sha ka por ban ïa burom mar kylliang katba ym pat lah ban pynbeit ïa u pud u sam. Kumta ka sorkar ka dei ban shim khia halor kane ka jingjia bad ban pynthikna ruh ba kum kine ki jingjia kin ym dei shuh ban dang ïai jia biang ha khappud”.
U la ong ba ka jingkynnoh ba ki tuh dieng na Assam ruh kam long kaba shisha namr kine ki pom na ka khlaw shnong ban ïoh thang ding. Kane ka jingkynnoh ka dei tang ban aidaw hynrei ka jingthmu kine ki pulit Assam ka long beit ban pyndik bad dawa pisa na ki paidbah khappud ka jylla kaba la jia na ka por sha ka por kumba la ïathuh da ki trai shnong.