Dei ban kem shwa ïa kiba donkti siat ïap sa dawa CBI, NIA ne ki Commission tohkit: HSPDP

Shillong, Naiwieng 23: Ka Hill State People’s Democratic Party (HSPDP) ka la dawa ba dei ban kem mardor ïa ki pulit jong ka Assam kiba donkti ban siat ïap ïa 5 ngut ki nongshong shnong ha Mukroh hynnin ka sngi 22 tarik Naiwieng, ha shwa ba kan wan ka jingtohkit CBI lane NIA ne kiwei ki jingtohkit.
Haba kren bad ki lad pathai khubor, u President jong ka HSPDP, Bah KP Pangniang u la ong, “Katkum ka ain jong ka Ri hadien ba la ujor ïa ka ejahar ki dei ban kem mardor ïa kito ba donkti bad dei ban set ha patok watla ka don ka hok ban shah bishar.”
Da kaba pynkynmaw ba katno u pang ka mynsiem kum u nongïalam ban ïohi ba haduh sawngut ki briew ki kyllon ha kuli ki pulit Assam ha u 2010 ha Langpih, u Bah Pangniang u la ong ba katei ka jingleh jong ki briew kiba bat ïa ka aiñ ka long thik kumba kim don shuh ïa ka mynsiem briew ne ka mynsiem sngewlem para briew.
“Kumta ngi dawa katkum ka aiñ jong ka Ri ba lada uno uno u briew ba donkti ha ki kam bymman shisien ba la dep ban ujor ejahar dei ban kem mardor ïa ki bad kwah ban ïohi ba kin don ha patok,” u la bynrap biang.
Nalorkata, u ong ruh ba ki la ïohi ïa ka jingkren jong u Myntri Rangbah ba shen ka sorkar kan sa leit ban kynduh ïa u Myntri Kampohiing ka ri ha Delhi ban dawa ban thaw da ka kynhun tohkit la ka long da ka CBI lane ka NIA ne da kino kino ki commission.
“Kaei kaba ngi dawa ka long ba katkum ka aiñ dei ban kem mardor bad aiti noh sha ki pulit Meghalaya ïa kito kiba donkti bad set ai ki ha patok bad hadien kane sa thung ïa ka kynhun tohkit lane ka commission,” u la bynrap biang.
Ha kajuh ka por u ong ruh ba ka sorkar jylla mynta kadei ban pynleit jingmut ruh na ka bynta ban pynstet noh ban pynbeit pura noh ïa u pud u sam ha ka kylla kaba ar bad ka Assam khnang ba kum kitei ki jingeh kiba tyngkhuh ha ki khappud kan kut noh syndon.
U ong ruh ba ki kwah ban ïohi ba ka sorkar ha ka jaka ba kan bunkam ha kaba sam ïa ki sniang syiar lyngba ka FOCUSS kadei ban don da kawei pat ka Focuss ban pynbeit kham kloi ïa u pud u sam.
Shuh shuh u ong ruh ba kadei ka kamram jong u Myntri Rangbah ban khot da ka Coordination Committee jong ka MDA ban ïakren lada jia ba ka sorkar Assam kam pat khih na ka bynta ban sdang noh ïa ka jingkren pynbeit pud ha ka kylla kaba ar na ka bynta kito ki jaka ba dang sah ban pynbeit.
“Lada buh ban pyndep shwa ka Kristmas dei ban pyndep noh khnang ba kum kine ki jingjia ba sngewsih kin ym jia shuh,” u la ong.
Shwa kane, u Bah Pangniang u la ong ruh ba ka aiñ ha Ri India ka long salonsar kumjuh ïa kito kiba donkti ban siat ïap pathar la kadei ha ka jaka ba don jingïakajia pud lane ha ka jaka bym don jingïakajia pud. U ong ruh ba kiba donkti ha kum kitei ki kam dei ban kem bad pynshitom beit.