Dawa hiar shuki u Bah Paul ïa u Bah Lahkmen, pynrem ki MLA halor ka jingjia ha Mukroh

Shillong, Naiwieng 23: U Working President ka UDP u Bah Paul Lyngdoh ha ka sngi Balang u la dawa ba u Bah Lahkmen Rymbui uba dei u Myntri ba bat ïa ka kam poh ïing ka jylla u dei ban hiar shuki noh namar ka jingbym lah jong u ban ïada ïa ka jingim jong ki paidbah nongshong shnong ka jylla kat kum ka jingdawa ka kam ba u bat.
“U Bah Lahkmen u dei ban shim jingkit khlieh halor ka jingjia ha Mukroh bad u dei ban hiar shuki noh mardor namar um lah satia ban ai jingïada ïa ki paidbah ka jylla wat haduh ba kan wanrah ïa ka jingduh ei ki san ngut la ka jingim,” u la ong haba kren bad ki nongthoh khubor.
Kane ka jingdawa u Bah Paul ka long hadien ba san ngut ki Khasi ki la shah siat ïap ha ki pulit Assam ha ka shnong Mukroh ha ka sngi Ba-ar.
U Bah Paul u la ong ruh ba kane ka jingjia ka pyni shai kdar ba u Bah Lahkmen u la pheil lut nadong shadong kum u Myntri ka tnat kam poh ïing. Ha ka sngi Ba-ar u Bah Lahkmen u la ai jingshai ruh sha ki nongïalam ka party hadien ba u la wan ïuhkjat sha katei ka shnong.
U Bah Paul u la buh jingkylli ruh halor ka jingkam u Bah lahkmen ba um don jingtip ha kaba ïadei bad ka jingshah siat ïap ki Khasi ha Mukroh, “Kumno ki trai muluk kin shah siat ïap ha la ka khyndew ka shyiap bad ha kano ka nongrim ba u myntri kam poh ïing un thet kti da kaba ong ba u khlem ai hukum ban siat kuli sha ki riew paidbah kumno un shu shim jingkit khlieh ma u”
U la ong ruh ba u Bah Lahkmen um don hok shuh ban dang bat ïa kane ka tnat namar um lah satia ban leh ïa ka kamram kum u myntri ba peit ïa ka kam poh ïing.
Kumjuh ruh na ka liang u MLA ka Mylliem Constituency u bah Hamlet Dohling bad u MLA ka Nongpoh u bah Mayralborn Syiem ki la pynrem jur ïa kane ka jingleh dusmon ki pulit Assam ïa ki mynsiem briew ba lui lui bad ki dawa ba dei ban ai ka jingpynshitom kat kum ka aiñ ïa kitei ki pulit ba donkti da kaba dei ban kem bad set phatok ïaki. Ki la phah ïaka khubor sngewlem sha kiba haïing hasem jong kito kiba la duh noh ïa kiba ieit ba thoiñ jongki bad kumjuh ruh kitbok ba kito kiba mynsaw ruh kin nang koit na ka sngi sha ka sngi. Ki dawa ruh ba ka sorkar ka dei ban aiti tohkit ha ka kynhun tohkit ba lait luid halor kane ka jingjia ba sngewsih.