Shillong, Naiwieng 23 : Ka sorkar jylla ka dang bishar bniah mynta ha shwa ba kan weng noh ïa ka jingkhang internet kaba 48kynta ha ki 7 tylli ki distrik jong ka jylla, kata ha East Khasi Hills, West Khasi Hills, Eastern West, South West Khasi Hills, Ri Bhoi, East Jaintia bad West Jaiñtia Hills.
Kumban shu kdew hangne, ka sorkar ha ka sngi Ba-ar ka la pynmih ïa ka hukum ban khang ïa ka internet hadien ka jingjia shah siat ïap jong ki san ngut ki nongshong shnong ka Mukroh ha ki pulit jong ka Assam. Katei ka sienjam ba ka shim ka long da ka thong ban tehlakam ba kan ym pur ne kan ym phriang kano kano ka jingthoh, ki dur ne ki video kiba lah ban ai ding shuh shuh ïa katei ka jingjia.
“Ngi aiti mynta ha ka tnad Pulit ban peit bad bishar bniah la ka jinglong jingman ka la wanphai biang neem bad lada kam don ei ei shuh lehse naduh la shai (Sngi Palei) ngin sa peit ba ngin lah ban weng noh ïa katei ka jingkhang internet,” ong u Symbud Myntri Rangbah ka jylla, Bah Prestone Tynsong haba kren bad ki lad pathai khubor.
Shwa kane, u Symbud Myntri Rangbah u la ong ba ha kane ka juk social media ki mih bad phriang bun kiei kiei kiba lah ban ktah wat ïa ka jabieng ym dei eh tang na ka bynta kito kiba dei na katei ka thaiñ ba don ka jingjia hynrei teng teng ïa ka jylla Meghalaya baroh kawei bad ka ktah lang ruh wat shabar jong ka Meghalaya ruh.
“Ka rai ba ngi shim ban khang internet ka long ba lada mih kum kine kiei kiei kan ktah bha bad ka lah ban kylla long ruh kum ka ishu ïapher jaidbynriew. Kumta namar ngim kwah ban long kumta, na kata ka daw ngi khang shwa ïa ka internet,” u la bynrap biang.
Shuh shuh u ong ruh ba bun khlem pyrkhat ki pynphriang ha ki social media kat kaba ki ïoh kumta ha ka jinglong briew ka don bad ka rung beit ka jingsngewdom bad kumta ka sorkar da kaba khang internet ka pyrshang ban khang ïa katei ka jingsngew ba kan ym pur la ka long ha ka jylla ne wat shabar ka jylla ruh kumjuh.
Ha kawei pat ka liang u la kubur ba ha kane ka juk mynta baroh ki donkam ïa ka internet la ka long naduh kiba dang pule haduh kiba treikam hynrei u kyntu pat ba kin iai shah shwa na ka bynta shipor arpor.
