Baroh u briew un ïap hynrei ban ïap ha kti ki briew ngim lah pdiang: Bishop Purely Lyngdoh

Shillong, Naiwieng 23: U President ka Shillong All Faith Forum (SAFF) u Rev Bishop Purely Lyngdoh u la ong ba kum ki briew kba u nongthaw u la thaw baroh ym don satia uba lah ban lait ne kiar na ka sni ka jingïap bad ka jingwan ka jingïap ha u briew kan dei na ka daw ka pang ka shitom ne ka jinglong tymmen hynrei ba ka jingïap kan wan rong noh ïa u briew ha ka kti uwei pat u briew ka long kaei kaei kaba ym lah satia ban pdiang ne hun.
Haba kren ha ka jingïaseng duwai na bynta ki san ngut kiba la shah siat ïap ha ki Pulit Assam kaba la pynlong da ka Synjuk ki Nongsynshar Shnong Ka Bri U Hynniewtrep (SSNBH) ryngkat ka SAFF ha U Soso Tham Audotorium u Bishop Purely u la ong ba ka jingshah dkhat jubor ki san ngut ki mynsiem kiba u nongthaw u la buh ba kin im ha sla pyrthei ka long kaei kaei kaba yn ym don mano mano ban lah ban pdiang hynrei ki kwah ba ka aiñ kan shim la ka bynta ban pynshitom ïa ki.
“Ka jingïap kam ïaid lait na mano mano ruh hynrei kan wan rong beit ïa u briew ha kano kano ka sngi na ka daw ka jingpang jingshitom ne ka jinglong tymmen bad kane hi ka dei ka jingïap kaba kaba ka mariang ka la buh beit buh ryntih hynrei ba ka jingïap kan wan namar ka jingshah shim ha uwei pat u briew uba dang dei u para jingthaw ka dei kaei kaei ka kam kaba ym lah ban shu hun noh, namarkata ngi kwah ba ka aiñ kan shim la ka bynta ban ai saja ruh kat kum ki kyndoon aiñ” u la ong.
U la ong ruh ba ka jingïap jong ki san ngut ki rangbah ha ka shnong Mukroh ha ka kti ki Pulit Assam u kyrmen ba kan ym shu dei ka jingïap ba kut noh kumto hynrei u kyrmen ba kan long kum ka jingaiti jong ki la ka jingim bad ba ka jylla kan kyndit bynriew ban pynbeit pynryntih noh ïa u pud u sam hapdeng ka Meghalaya bad Assam kaba la sah teng la da ki 50 snem.
U la kyntu ïa u Myntri Mangbah ka jylla bad ka sorkar ba kin wanrah ïa ka hok sha ka jingshai bad ban pynshai kdar sha u paidbah ïa kaei kaba la jia bad kaei kaba ka sorkar kan leh, bad ïa ka jingthmu jong ka.
U la ong ba ha ka juk stad Science & Technology u briew u la lah ban leit kiew shaduh ka sahit bneng hynrei ïa ka jingim bad ka jingïap, u briew ha pyrthei u nym lah da leilei ban shemphang namar ka jingim bad ka jingïap ka dei ka maïan kaba u kynrad u la buh.
U la ong, “Kumta dei ban sngewthuh ba katba dang im ha pyrthei ngi dei ban long ki briew kiba don ïa ka mynsiem ka jingïatip lem bad ka jingsngewsynei parabriew khnang ba ka suk ka saiñ kan shong ha ka jylla bad ha ka mynsiem briew.”
U la kyntu ruh ïa ki paidbah ka jylla ki sengbhalang bapher bapher bad ïa ka jaidbynriew hi baroh kawei ba kin wan shakhmat da ka mynsiem ban ïatrei lang ban kner ïa ka kti ka jingïarap sha ki nongïalam ha ka jingïaleh ban pynbeit pynryntih noh ïa u pud u sam hapdeng ka jylla Meghalaya bad Assam.
“Nga kwah ban kyntu ruh ïa ki seng saiñ pyrthei baroh ba kin don lang kawei ka buit bad kawei ka bor na bynta kane ka jingjia ym ban shim kabu saiñ pyrthei na bynta ka jingmyntoi jong ki shimet,” u la kyntu.
Shuh shuh ha ka jingduwai jong u u Bishop Purely u la duwai ba u Kynrad Nongbuh Nongthaw un syrpud syrpai ïa ka ïing kaba la duh noh ïa kiba ieid ba thoiñ bad ba ki paidbah ka jylla ruh kin lap jingtngen ha u Blei bad ban ym mih kano kano ka jingjia kaba pynthut ïa ka suk ka saiñ.
Ha kane ka sngi la sakhi ba u Myntri Rangbah ka jylla u Conrad Sangma, u Symbud Myntri Rangbah ka jylla u Bah Prestone Tynsong, u Bah Sanbor Shullai myntri sorkar, u Chief Secretary ka jylla u DP Wahlang, ki ophisar ka sorkar jylla, ki nongïalam jong ki niam bapher bapher ka jylla, ki khlieh nongsynshar shnong bad ki riewpaidbah.
Hadien ba la kut ka jingduwai ka don ka jingbuh syntiew bad ka jingthang mombati ban leh burom khatduh ïa ki san ngut ki rangbah ba la shah dkhat noh ka jingim ha ka kti ki pulit Assam.