Ka jingdom jingbitar kan don beit bad ka jingthang kali kam lah ban wanrah ïa ka hok ki san ngut: CM

Shillong, Naiwieng 23: U Myntri Rangbah ka jylla u Conrad K Sangma u la ong ba ka jingshah siat ïap ki san ngut ki Khasi ha Mukroh ka wanrah ïa ka jingdom jingbitar ha ki paidbah ka jylla namar la shu dkhat im im peit peit ïa ka jingim ki ïa ki luilui ba khlem tiar khlem tar ha ki pulit kiba la kieng atiar bha.
Haba kren bad ki lad pathai khubor u Myntri Rangbah u la ong ba ka jingjia shah siat ïap ki san ngut ka dei ka jingjia kaba sngewsih bad kaba baroh hi ki nongshong shnong ka jylla kin sngewdom sngewbitar ïa kaei kaba la jia hynrei wat la katta ka donkam ba ki nongshong shnong ka jylla ba kin long kiba jaijai.
Haba la kylli halor ka jingshah thang kali, u Myntri la ong ba ka jingthang kali ka ju jia haba don ki jingjia ba kum kane hynrei kane ka jingthang kali kan ym pynïohnong satia ïa ka jylla ne wat ïa ka hok ki san ngut kiba shah siat ïap.
“Ka jingthang kali nga kwah ban kren da kaba shai ba kan ym wanrah satia ïa ka jingïohnong ïano ïano bad wat ka hok ki san ngut ruh kan ym lah ban pynïoh, namarkata, nga kyntu ïa ki paidbah bad ki seng bhalang baroh ba kin long kiba jaijai bad ban shaniah ha ka sorkar namar ngi ruh ngim shym la shong kli kti halor kane ka mat,” u la ong.
Shuh shuh u la bynrap, “Lashai ka sngi ngin leit sha Delhi ban kynduh bad u Amit Shah ban ïakren halor kane hi ka mat bad ban pynïoh ïa ka hok ki san ngut, te ki paidbah ki dei ban shniah ha ka sorkar ban ban ym wnarah kino kino ki jingkulmar ban pynthut ïa ka shongsuk shongsaiñ.”