Jowai, Naiwieng 23 : Ka Jaiñtia Student Union (JSU) mynta ka sngi ka la rah da ka lama ïong haka por wan ïuh kjat u Myntri Rangbah bad u Symbud Myntri Rangbah ka jylla bad kiwei ki myntri jylla hapoh ka shnong Mukroh West Jaiñtia Hills bad ka seng ka la pyrta shla bad dawa na u sorkar jylla ban buh ïaka Police regiment ha ka shnong Mukroh ban ïoh jingïada ki paitbah kiba shong ha khappud.
Ka seng ka ai ruh da ka dorkhas bad ka ki saw tylli ki mat jingïada kaba nyngkong ban dawa na ka sorkar jylla ban pyntikna ban ai ïa bor pahara kaba skhem ha ki jaka khap pud bad ban ai ïaka hok kiba shem lanot kiba la ïap ei ha u kuli ki pulit Assam ha Mukroh.
Kaba ar ka seng ka la dawa na ka por shaka por na ka sorkar jylla ban buh noh daka ktem pulit ap pahara ïaki jaka khap pud ban lait na ka buhai shnong ki pulit Assam bad wan rah biang ïaka jingsuk bad ka jingshong shngaiñ.
Kaba lai ka seng ka dawa ruh na ka sorkar ban wanrah biang ïaki 36 tylli ki shong Khasi bad Jaintia (Block-1) sha ka jylla Meghalaya bad ban pynduh ïaka Notification 1951 jong u Governor of Assam bad kaba saw ka seng ka dawa na ka sorkar jylla ban ai noh khlem da pynslem shuh ïaka lad jingïarap sha ki longing kiba duh ei iaki baieid bathoiñ bad kiba mynsaw ha u kuli ki pulit Assam bad Forest guard.
Ha ka jingïakren u Myntri Rangbah bad ki nongïalam ka seng JSU ha Mukroh mynne na ka liang u Conrad u lah kular ban shim khia ban buh iaka ktem pulit ha Mukroh ban ai jingïada ïaki nongshong shnong khappud bad ban pyrshang ban wan rah ïaki shnong Khasi Jaiñtia na Block ha ka jingpynbeit pud bad ka jylla Assam.
