Nongpoh, Naiwieng 23: Ka Dorbar Shnong Nongpoh kan pynlong ïa ka jingpynkhuid shnong ha ka 26-11-2022 naduh ka por 7baje mynstep bad kane ka long shi bynta ban wan rah ïa ka khuid ka suba hapoh ka shnong ka thaw.
Na ka liang u Rangbah Shnong, u Bah Silvester Mynsong u la kyrpad ïa baroh ki paidbah nongshong shnong, ki nongsahwai bad kumjuh ruh kito kiiba don jaka ha Nongpoh ki dei ban ïa shim bynta ha kane ka jingpynkhuid shnong ka Shnong Nongpoh, kaba la ju leh man la u snem na ka bynta ban wan rah ïa ka khuid ka suba hapoh ka Shnong ka thaw.
Kino kino kiba ym shim bynta lang kumba la bthah da ka bor shnong kin ngat ha ki kyndon ba la buh da ka Dorbar Shnong. La pyntip ruh baroh ki dukan paidbah kin khang shipor ha ka por ba dang don ka jingpynkhuid shnong.
