Hadien ba ladep ïapynbeit bad ïasoi ïa ka jingpynbeit pud ha ki 6 tylli ki jaka, ka Meghalaya bad ka Assam mynta ki la phai khmat pat sha ka jingsdang ban ïakren ïapynbeit pat sa ha ki 6 tylli ki jaka ba dang sah kiba dang don hapdeng ka jingïakajia naduh ba la ïoh la ka jong ka jylla.
Lah ban kdew hangne ba u Myntri Rangbah ka Meghalaya u Conrad Sangma ryngkat ka jingïadon lang ki Myntri bad u Himanta Biswa Sarma ryngkat ka jingïadon lang ki Myntri, ki la ïa soi ïa ka Memorandum of Understanding (MoU) hakhmat u Myntri Korbar ri, u Amit Shah ban ïabeit noh ïa u pud u sam ha Hahim, Gizang, Tarabari, Boklapara, Khanapara-Pilingkata bad Ratacherra.
Hapdeng ka jingpdiang sngewbha kiba bun ïa kane ka jingïapynbeit pud kaba la jia long hadien sanphew snem, la ïohi pat ïa ka jingbymhun jong ki katto katne ki Shnong kiba na West Khasi Hills, ha kaba ka shnong jong ki, kaba ju don ha Meghalaya la pynhap noh sha Assam.
Sa ka jingkren u Bah KP Pangniang, ka la nang pynshit shuh shuh ïa kane ka jingkhynñiat jubor ïa ki katto katne ki Shnong sha Assam, haba u President ka HSPDP, u la ong ba ka sorkar kam shym la leh katkum ka jingai jingmut ka Regional Boundary Committee, ha kane ka Committee ka la ai jingmut ba ïa ki lai tylli ki Shnong kiba don ha khappud ne ïa kajia bad ka Assam kidei ban dpn beit ha Meghalaya. Hynrei ha ka jingïasoi kaba khatduh hapdeng ka Meghalaya bad Assam la pynngat ïa ki sha Assam.
Wat hapdeng kine ki jingbymhun, u Himanta bad u Conrad ki la pynpaw ba kan nym don shuh ka jingpynkylla ïa kaba ladep ïasoi, hynrei kin ïaid noh shakhmat na ka bynta ka jingïakren pynbeit pud na ka bynta kaba ar lane na ka bynta ki hynriew tylli ki jaka ba dang sah.
Ka jingïakren pynbeit pud ha ka bynta kaba ar kan dei ka jingïakren kaba kham kyllaiñ bad kaba kham eh, namar kine ki hynriew tylli ki jaka ba dang sah ki kynthup ïa ki jaka kiba ki paidbah ka jylla ki la mad ïa ki jingeh bad kidei ki jaka kiba ki paidbah na kitei ki jaka ki la mad ïa ka jingduh ei ki mynsiem ba kordor. Kine ki jaka ki dei ka Langpih bad ka Block I, Block. Ha ka thaiñ Langpih ki don da ki phew tylli ki shnong ba shong ki Khasi. Ka Block I, Block II lei lei ka la jan ïaryngkat bad ki Civil Sub Division, namar ka jingïar jong ka jaka.
Ka Langpih kadei kaba la don ka jingïaknieh naduh ka por ba dang synshar ki phareng, namar ki don ki rai bad ki map kiba pyni ba kadei ha Assam, hynrei ki don ki rai bad ki jingïakut kiba pynpaw ba kadei ha Meghalaya. Lada ïaid katkum ki san tylli mat jingïakren ba la buh ha kane ka jingïakren pud, ka Langpih kan hap sha Meghalaya, lada shim na ka jingdon ki Hima Khasi.
Ka Block I bad Block II, ki shai ba naduh mynshuwa ki hap ha Khasi Jaiñtia Hills, hynrei la pynïasoh noh ne la rah sha Karbi Aanglong ha ka por ba yn pat kha ïa ka Meghalaya, lyngba kata kaba ki ong ka Administrative Convenient lane na ka bynta ka jingbit jingbiang ha ka synshar khadar, namar ba kine ki jaka ki jngai na ka nongbah Shillong.
Hynrei katba nang mih ki sngi, namar ka jingshah ban beiñ jong ki paid Khasi ha kitei ki artylli ki Block, la mih ka jingdawa badei ban pynphai noh sha Meghalaya, haba ka la ïoh la ka jong ka jylla. Ha ka snem 2001, ha ka por ba long Myntri Rangbah, u (L) Bah EK Mawlong bad u Prafulla Mahanta,ki la rai ban pynphai noh ïa ka Block I bad Block II sha Meghalaya. Hynrei kine ki arngut ki nongïalam, ki la rem noh ha ki elekshon kiba long hadien katei ka rai bad kane ka kam ka la shu sahkut sah mynta.
Mynta ka shong sa ha u Conrad Sangma bad u Himanta Biswa kaei kaba kin rai halor kine ki jaka kiba kham kyllaiñ ban ïakren bad ïapynbeit bad kiba tang la bakla tiak ka rai ruh ka la ban mih ka jingpyrshah kaba jur na ki baroh arliang ki paidbah ki jylla.
