Dei ban thung da ka jingtohkit ba laitluid halor ka jingshah siat iap ki 5 ngut : Banteidor

Shillong, Naiwieng 22 : U Working President ka PDF uba dei ruh u Myntri kam sport & Youth Affairs bad Agriculture u bah Banteidor Lyngdoh u la ïathuh ba kum u nongïalam ka party bad ka party hi baroh kawei ki dawa ba dei ban thung da ka jingtohkit ba laitluid ban tohkit halor ka jingshah siat iap ki hynriew ngut ki mynsiem briew kiba dei ki nong Meghalaya bad uwei u Forest Guard jongka Assam bad bun ruh kiba mynsaw jur ha ka jingsiat pathar ki pulit Assam mynta ka sngi hajan ka shnong Mukroh, West Jaintia Hills.
U la ong na ka liang ka PDF ki pynrem jur halor kane ka jingjia ba sngewsih bad ki phah ruh ïa ka khubor sngewlem sha ki long ïing jong kito baroh kiba la duh ïa kiba ieit ba thoiñ jongki bad kit bok ruh ïa kito kiba mynsaw jur kiba dang don hapdeng ka jingshah sumar ba kin dang ïoh ïa ka jingkoit jingkhiah na ka sngi sha ka sngi.
U la ong “ Kane ka jingleh jong ki pulit Assam ka la dei ka jingthombor kaba na ka por sha ka por ïa ki paid khappud bad halor kane na ka liang ka party kan leit ujor shaduh ka National Human Rights Commission (NHRC) ban shim khia halor kane ka kam. Namar ka party kam kwah ban dang ïohi ba kum kine ki jingjia kin dang wan jia biang ïa ki paid khappud. Ngi da sngewkhia jur ïa kiba kum kine ki jingshah siat iap ki paid khappud kaba la ïai jia na ka por sha ka por bad ngi dawa ba ka sorkar Meghalaya bad Assam ki dei ban siew bai lutksan da kaba heh sha ki long ïing jong kito ki mynsiem briew kiba la duh ei ïa ka jingim jong ki bad kumjuh ruh sha kito kiba mynsaw ha ka jingjia bad kumjuh ruh ka dei ban pynlut nadong shadong ïa ka bai sumar ia ki haduh ba kin da koit bha”.
U la ong ba ka PDF kan ïai bud dien ïa kane ka jingjia namar kam kwah ban shu kut tang kumne hynrei haduh ban da ïoh ïaka kaiphod jingtohkit ka ba pynhun ïa kiba haiing hasem bad khamtam ban pynshimtom kat kum ka aiñ ïakito ki pulit kiba donkti ha ka dkhat jyndat ïa ki mynsiem briew. Kane ka dei ka jingthombor, jingleh thurmur bad leh riewkhlaw jong ki pulit Assam namar kim niewkor shuh ïaki mynsiem briew hynrei ki la shu shu siat iap beit la kum ki mrad. Kumta ki ar sorkar jylla ki dei ban shim khia bad leh ei ei halor kane.