Wan plie u Myntri Rangbah ïa ka Namdong C&RD Block kaba la dawa naduh 2007

Jowai, Naiwieng 20: U Myntri Rangbah duh ka sorkar jylla u Conrad. K. Sangma mynta ka sngi 21 tarik u Naiwieng, ula wan ban plie pyrda ïa u mawnongrim ka Namdong C&RD Block kaba la sah teng ha ka jingdawa naduh ka snem 2007.
La ïathuh ba ka jingdon jong kane ka Block ba pura ha shnong Namdong kan ïarap shibun eh ïa ki paidbah na kitei ki thaiñ nongkyndong kiba donkam jingïarap na ka sorkar lyngka kane ka ophis jong ka Block.
Ha kane ka sngi la wan ban don ryngkat naduh u myntri ka kam jngohkai u ma Sniawbhalang Dhar, u MLA ka 2-Jowai ma Wailadmiki Shylla, u CEM ka JHADC ma Thombor Shiwat, Director C&RD Department Shillong u Sibhi Chakravarthy Sadhu IAS nalor kiwei de ki ophisar bad ki paidbah nongshong shnong.
Ha kane ka juh ka sngi u Myntri Rangbah ula ïoh ruh ban plie sa lai tylli ki mawnongrim kawei ban kyntiew kyrdan ïa ka Namdong PHC sha CHC, ka Greater Mukhnang Lumrot Water Supply Scheme kaba la kot haduh T.46.12.26.350/- hapoh ka JJM, ka surok Jowai Nartiang Kdiap Khanduli Road (JNKK) ha kaba yn sdang ban khot tender ha u bnai Noprah mynta ka snem ïa kaba yn pyntrei da ka tnad Public Works Department (Roads) uba don haduh 59.955 km hapoh ka NDB 2000-23 ha ka jinglut kaba 40 klur bad la khap ruh ïa ar tylli ki kali kit nongpang ha kane ka jingïalang ba la pynlong ha Madan Sari Namdong-B.
Na ka liang u Myntri Rangbah haba ai jingkren ha kane ka sngi ula ai ka jingïaroh ïa u MLA ka thiañ ba dei lyngba ka jingïohi jngai bad ka jingtrei shitom jong u la lah ban pynurlong ïa kine ki kam pynroi na ka bynta ki paidbah ka Constituency.
Ula ong ba ka Block ka long kawei na ki bynta ba kongsan eh ban kyntiew ïa ka ïoh ka kot khamtam ha ki thaiñ nongkyndong, ‘Kumba haduh 80 percen ki kam pynroi ki wan lyngba ki Block’, shuh shuh ka jingdon kane ka Block kan ïarap shibun ïa ki paidbah ban pynïajan ïa ka rukom treikam bad ka sorkar ong u myntri rangbah.
Ula kyntu ïa ki ophisar naduh u BDO bad ki nongtrei (staff) ba kin trei bha ïa ka kamram na ka bynta ki paidbah bad ban pyni ïa ka akor ka burom, ka jingsbun, ka jingpdiang sngewbha khnang ba ka jingjop kan wan ha ki liang baroh.
Ula ong ba kane ka jingdawa ban buh ïa ka Block ha kane ka thaiñ Namnong kala long kaba la slem bha kaba la kot da ki phew snem mynta, hynrei mynta ka sngi la lah ban plie noh ïa ka. Ula pynsngew ba ka kam pynroi ka dei ka bynta kaba hakhmat eh jong ka sorkar MDA wat hapdeng ki jingeh ba ïa kynduh ha kine ki snem ba la dep na ka jingwan lyngshop ka khlam Covid-19.
Kumba long haduh mynta ka jylla Meghalaya ka dei kawei na ki jylla kaba poi ha ka kyrdan kum ka ‘Top State’ ha kaba ïadei ban ka jingpyntrei ïa ki kam pynroi lyngba ki project bapher bapher, “lada ngi phai mynshwa ka jylla ka don haka kyrdan kaba 27 hapoh ka ri hynrei ha kine ki 3, 4 snem ka jylla kala poi syndon ha ka kyrdan kaba 2 hapoh ka Ri” ong u Conrad.
Da kaba pynsngew lada phai ha ka jingpyntrei ïa ka skim MGNREGA na ka liang ka sorkar ha kine ki snem ba la dep kala pyllut haduh 600 spah klur hynrei mynta kala kynjoh sha ka 1500 klur kala long lai shah ka jingkiew ba ka budget jong ka sorkar jylla.
Ha kaba ïadei bad ka jingpynpoi ïa ka umbam haduh ki tyllong ïing lyngba ka skim JJM ka sorkar kala lah ban pynkiew tang hapoh kane ka ar snem na ka 4 hajar sha ka 2 lak tam ki longïing ban ïoh umbam. La ong ruh ba ka jylla Meghalaya ka dei kawei na ki jylla ba pyntreikam bha ïa kane ka skim bad kine baroh dei lyngba ka jingtreilang jong ki ophisar na ka thad PHE ong u Myntri Rangbah.
Ym tang kata ha kaba ïadei bad ka IT Mission ka jylla Meghalaya kala dei kawei na ki jylla kaba ïa nujor bad kiwei pat ki ri jong ka pyrthei kum ka China, Singapore, London, UK bad ka don ka thong ban ïaleh bad kitei ki ri.
Shuh shuh u Conrad ula pynsngew ba na ka liang ka sorkar ruh kala ïaleh ban wanrah ïa ki skim kiba ïadei bad ka jingseng kam la jong khnang ba ki khun samla kin lah ban ïeng hala ki jong ki kjat.
Ula ong kiba bun na ki paidbah kim sngewlyngngoh ha kaba ïadei bad ka jingjop ban pynlong ïa ka North East Olympic Game bad kiba bun na ki nongwan ïa shim bynta kila ai ka jingïaroh lyngba ka jingïaid beit jong kane ka kam ïalehkai hapoh ka jylla.
U don ka jingkyrmen ba ka kane ka sorkar kan dang ïaibteng ban wan ha ka bor synshar ha kane ka Election ban wan, khang ba kan dang lah ban pyntrei shuh shuh ïa ki kam pynroi hapoh ka jylla.
Na ka liang u MLA ka thaiñ u ma Sniawbha lang Dhar haba ai jingkren ula pynsngew ba kane ka jingplie ïa kine ki project saw tylli ki project jong ka thaiñ Namnong ka long ka jingsah kynmaw ïa kane ka thaiñ hi baroh kawei.
U ong ba ka ïa ka jingkyntiew kyrdan ïa ka Namdong PHC sha ka CHC ha ka jingshisha ïa kane ka CHC la dep ban sanction naduh kine ki snem bala dep hynrei na ka jingwan ka khlam Covid-19 la slem ban plie ïa ka.
Ula kren ba NPP kan sa wan marwei (single Majority) ha kane ka Election 2023 namar ki kam jong kane ka sorkar kala leh na ka bynta ki paidbah da kaba u ong ba ki paidbha ki kham stad shibun eh ban jied ïa ki nongmihkhmat.
Na ka liang u Waheh Shnong ka Namdong-B ula pynpaw ka jingsngewnguh ïa u MLA ka thaiñ ula wanrah ïa kane ka Block kala la rim bha haka jingdawa naduh ki nongïalam shnong bad ki kynhun seng Bhalang kaba la urlong mynta ka sngi.
La pynshong shit shuh shuh ïa kane ka sngi da ka jingshad bad ki jingrwai daki nongshong shnong ka Namdong-B, ïa ki kyntien ai pdiang la ïoh na u Deputy Commissioner ka WJHD bah B.S Sohliya, katba ia ki kyntien ai khublei la ioh na u Project Director u P.K Boro, ha kane ka sngi la sma ruh ïa ki khun sniang bad ki syiar sha ki nongrep ka thaiñ.