Shillong, Naiwieng 21 (PIB): Ka skhim PM KISAN ka dei ka skhim jong ka Sorkar Pdeng ban pyndap ïa ki jingdonkam pisa jong ki nongrep kiba don la ka jong ka jaka puta. Haduh T. 6000 ha ka shi snem ka dei ka pisa kaba leit sha ki bank account jong ki longïing nongrep lyngba ka direct benefit transfer. Ki don katto katne ki thup kiba kham biang ka kamai kajih ki bym ioh bynta ha kane ka skhim.
Kane ka skhim ka dei kaba la sdang ha ka 24 tarik u Rymphang, 2019 da u Myntri Rangbah Duh, bad kadei kawei na ki skhim Direct Benifit Transfer (DBT) lane ka skhim ba poi beit sha ki paidbah ba heh tam ha ka pyrthei. Kane ka skhim ka la lah ban poi sha ki klur ngut ki nongrep, haba ym don jingtuklar mano mano hapdeng ka kam. Lyngba ka jingpynthikna ïa ka jingshai kaba pura ha ka kam pynrung kyrteng bad ka jingpynshisha ïa kito kiba dei ban ïoh jingmyntoi, ka Sorkar India ka la lah ban pynpoi pisa tang katto katne minit hadien ba la shon u Myntri Rangbah Duh ïa u dak ha ki por ba la pyllait pisa.
Ka jingpyllait ia ki jingmyntoi ha kano kano ka bynta hapoh ka PM KISAN mynta ka la tam ïa 10 klur ngut ki nongrep na ka 3.16 klur ha ka bynta kaba nyngkong – kaba long ka jingkiew lai shah ha ki lai snem.
Ka PM KISAN ha ki lai snem ka la lah ban ai jingkyrshan pisa kaba palat T. 2 lak klur sha ki nongrep kiba donkam jingïarap. Na kane ka pisa, palat T. 1.6 klur ka dei kaba la pynpoi naduh ka jingpakhang dam namar ka khlam Covid.
Ka PM KISAN ka dei ka skhim ka ba dang kylla. La sdang ïa ka skhim da kaba peit ka jingioh bynta ki nongrep kiba ai jingpynshisha hi da ki nongrep. La pynbha shuh shuh katba dang iaid ka por ha kaba iadei bad ka rukom ba ki nongrep ki pynrung kyrteng ialade bad ia kaba la pynshisha da ki jylla.
Ka jingjop jong kane ka skhim ka shong ha ki jingpynbha ba wanrah na ka por sha ka por na ka bynta ka jingpynshisha jong ki jingai jingtip na ki nongrep. Ki don ki bynta kiba la buh kiba hap ban ai jingtip naduh ba la sdang ïa ka skhim khnang ban don ka jingpynshisha kaba nyngkong. Shisien ba la peit ïa ki jingai jingtip da ki nongrep bad la pynshisha da ki jylla, la kyntiew ia kane ka jingtip ha ka rynsan PM KISAN bad ia kane la phah sha ka PFMS ban pynshisha ia ki jingtip kiba ïadei bad ki kam pisa; sha ka UIDAI ban pynshisha ïa u Aadhar; sha ka income tax server ban peit ïa ki jingsiew khajna; bad sha ka NPCI ban pynshisha ïa ka jingpynïasoh ïa u Aadhaar bad ka bank account. Kane ka la plié lad ïa ka Sorkar ba kan pynshisha ïa ki nongioh jingmyntoi kiba la don lypa bad ruh kito kiba dang rung thymmai hapoh ka skhim.
Ka PM KISAN ka dei ka jingkylla kaba khraw ha ka rukom ai jingkyrshan ka Sorkar ïa ki nongrep ha India bad kadei kawei na ki nuksa ba biang tam jong ka jingai jingsynshar kaba bha bad ruh ka jingpyndonkam ïa ki kam digital ban pynpoi ïa ki kam sha ki briew. Da kaba pyndonkam ïa ki teknoloji digital ha ka jingpyntreikam ïa ka PM KISAN, ka Sorkar ka la shim ruh ïa ki sienjam ban pynbiang ki kam digital ia ki kam rep. Kane kan dei sa kawei ka jingbha ïa ki paidbah kaba wan ha ki kam rep lyngba ki kam digital, ka jingpyndonkam ïa ki jingtip hapoh ka PM KISAN kum ka nongrim jong ki jingtip shaphang ki nongrep ha ka ri bad yn peit ïa kane da ki jylla.
Ka jingwanrah ïa kane ka Agri stack ka plié lad ruh ïa ka Sorkar ba kan pynpoi ïa ka skhim PM KISAN sha baroh kiba dei ban ïoh jingmyntoi bad ban pynshisha ia baroh kito kiba don lypa hapoh ka skhim, katkum ki rukom treikam ka skhim. ïa ki jingai jingtip shaphang ki patta jaka la pynïasoh bad ki jingdon jingtip ki jylla khnang ba ki jingpynïasoh nangne shakhmat bad ki jingdon jingtip ki jylla ka ïaid beit ïaid ryntih. Ka E-KYC jong ki nongrep bad ki jingsiew ba pyndonkam da ka Aadhar Payment Bridge (APB) ki dei ki kam ba la sdang da ka tnat ka rep ka riang ban wanrah jingshai shuh shuh hapoh kane ka skhim. Kane ka kam kan iarap ruh ban weng noh ïa ki kyrteng jong ki nongrep kiba la khlad noh lane kito kiba la die noh ïa la ki jaka, bad kumta ki bym dei ban ïoh bynta shuh ha kane ka skhim.
Ki don shibun ki jingwad bniah, kiba pyni ba ka skhim PM KISAN ka la ïarap ïa ki nongrep ba kin lah ban trei kham bha ha ki kam rep jong ki. Kane pat ka la kyntiew ïa ka kam rep baroh kawei.
Kum ban shu kdew, ha ka jingwad bniah ba la pynlong lang bad ka ICAR, ka International Food Policy Research Institute (IFPRI), ka la lap ba kane ka skhim ka la ïarap bha ban pynbiang pisa ia ki nongrep ba kin thied ia ki tiar kiba ki donkam ha ka kam rep jong ki. Shuh shuh, na ka bynta ki nongrep kiba trei ha ki kam kiba rit, ka la ïarap ïa ki ba kin pynbiang ïa ki jingdonkam jong ki ha ki jaka rep bad ruh ha ki jingdonkam ba man ka sngi jong ki, ka pule puthi, ka koit ka khiah bad kiwei kiwei ki jinglut jingsep.
