Ba kuman ka sorkar ban ïarap ïa ki ki riew donsap, shong kyllaiñ myngngor u President ka AMDA

Shillong, Naiwieng 21: Namar ka jingkuman ka sorkar ban sngap ïa ka jingdwa ba shongnia ki riewdonsap ha ka jylla, ha ka sngi Nyngkong u President ka All Meghalaya Dancers Association(AMDA) u Bah Kitbok Thabah u la pynlong da ka jingïakhih shong kyllaiñ myngngor ha khmat ka Secretariat ban pynbor ïa ka sorkar ban pynurlong noh ïa ki mat jingdawa kiba ka seng ka la buh ha khmat ka sorkar naduh u snem 2003.
Haba kren sha ki lad pathai khubor u Bah Kitbok Thabah u la ong ba kine ki mat jingdawa kaba ki riewdonsap ki dawa ka dei kaba shongnia ba ka sorkar kan phai khmat lem sha ki khang ba ka sap kaba ki don kin nang lah ban kham pynjanai shuh shuh na kaei kaba ki la don lupa.
U la ïathuh ba ka mat jingdawa kaba ka AMDA ha ryngkat kiwei ki riewdonsap ki buh ha khmat ka sorkar ki long ba ka sorkar kan ai jingkyrshan pisa (Financial Assistant) ïa ki riew donsap kiba shah jied ban leit mih khmat sha kino kino ki rynsan bad kumjuh ruh ba kan seng noh ïa ka institute na bynta jong ki khnang ba kin ïoh ban pyntbit kyrpang ha ka sap kaba ki don kaban long ruh ka lad kamai ia ki ynda ki la lah ban mih sha ki rynsan kiba pher bapher.
U la ong ruh ba kum u nongïalam ba hikai shad ïa ki khynnah ba don sap ha ka shad ba kum kane ka khep ba un hap da wan shong ban rah placard ha khmat ka Secretariat kam u kham jia koit lait noh tang ha ka por jong ka jinglong Myntri Rangbah u Dr Mukul ha ki khyndiat snem mynshuwas bad ha kane ka kynti ba u long Mynri Rangbah u Conrad Sangma.
U la ong ba ka jingdawa ban ai jingkyrshan da ka pisa ka long ba ki samla donsap kiba wan na ka iing baduk kin ym duh noh ka kabu ba kin leit ïakob sha ki rynsan kiba sha bar jylla bad bar ri ruh.
“ Haba ki khynnah ki thmu ban leit ïa khun sha kiwei ki jylla kim banse ban leit ha khmat jong u nongmih khmat ban pan ka jingïarap hynrei u nongmih khmat shaei un lah ban kyrshan na ka skhim shimet kum u MLAS bad bunsien wat tang ka bai shong rel ruh u nongmih khmat um lah ban ïarap, namarkata donkam ba ka sorkar kan leh eiei halor kane ba ki samla kin ym duh ka lad ban pyi pyrthei ïa ka sap jong ki” u la ong.
Haba kylli halor ka jingïakhih ba tang marwei jong u, u Bah Kitbok u la ong ba kane ka jingïakhih ba marwei jong u ka long namar ka sorkar a pynjari ïa ka kyndon 144 CrPC bad ba na ka liang jong u um kwah satia ban pynkheiñ ïa ka kyndon aiñ.
Haba jubab haduh lano un weng ïa kane ka jingïakhih jong u, u Bah Kitbok u la ong ba kane ka jingshong kyllaiñ myngngor jong u ha khmat Secretetiat kan neh beit katba ka sorkar kam khot ïakren ban shim ïa ka rai halor ki mat jingdawa jong ka kynhun.