Wat la ka por ka la thmit triang skhem u Myntri ba ka GSWSS yn pyndep beit ha u Nohprah

0

Shillong, Naiwieng 17: U Myntri ba peit ïa ka tnat Public Health Engineering (PHE) u Bah Renikton Lyngdoh Tongkhar ha ka sngi Palei u la ong ba na ka liang ka tnat kam pat shym la rairem noh halor ka thong ba la buh ba ïa ka Greater Shillong Water Supply Scheme (GSWSS) phase-III yn pyndep beit ha u Nohprah mynta u snem.
“Ka kam ka la ïaid shaitshait halor ka jingtrei ïa kane ka projek sam um ha Shillong bad ngi angnud ruh ba dei ban ïoh plie beit ïa kane ka projek ha une hi u snem,” u la ong ha ba kren sha ki lad pathai khubor.
U la ong ruh ba na ka liang ki kontraktor ki mynjur ba ïa kane ka projek kin pyndep beit shuwa ban poi u Nohprah.
Shuh shuh u la ong ba ba ka jingeh kaba ka tnat ka ïa kynduh ka dei na bynta ban tih ïa ka surok ban thep ïa ki pipe um namar ki don ki katto katne ki shnong kiba ym ai jingbit bad ong ruh ba ban weng ïa kane ka jingeh ki ar tylli ki tnat kata ka PWD bad ka PHE ka pyrshang ban weng ïa kane ka jingeh.
“Nga la bthah ïa ki kontraktor ban wad ïa ki lad ki lynti lada don kino kino ki jingeh ba ki ïakynduh lada dei hapdeng ki shnong ne ki tnat sorkar bad nga ong ruh ba da ki kynduh kano kano ka jingeh ba kin wan pyntip sha nga lada dei kaba donkam ba ngan tuklar hynrei kat haduh mynta ym pat don mano mano ba ai ktien. Namarkata, nga ngeit ba baroh ki jingtrei ki ïaid beit bad ba kin lah pyndep shuwa ban kut une u snem” u la ong.
U la ïathuh ruh ba na ka liang ka tnat ka la ïoh shibun bah ki jingujor khamtam na ki thaiñ Mawlai halor ka jingtih ïa ka surok.
Lah ban kdew hangne ba ka sorkar ka la mang na bynta kane ka skhim sam um ha sor ha ka jinglut ba 65 klur.

Leave A Reply

Your email address will not be published.