Ngam ju sam lyndet ïa ka skhim MLA, hynrei haba shit haba shai: Bah Banteidor Lyngdoh

Shillong, Naiwieng 17 : U Bah Banteidor Lyngdoh MLA ka Mawkynrew Constituency u la ong ba naduh u 2018 ba ki paidbah ki la pynjop ïa u, um ju sam lyndet ïa ka skhim MLA hynrei haba shit haba shai. “Naduh ba ki paidbah ki la pynjop ïa nga kum u MLA ha u snem 2018 bad haduh mynta ruh ngam ju sam lyndet na ki paidbah ïa ka skhim MLA hynrei nga sam haba shit haba shai bad kaba khuid,” ong u Bah Banteidor Lyngdoh haba kren sha ki nongthoh khubor hynne ka sngi Palei hadien ka jingïalang plie maw nongrim ban shna thymmai ïa ka ophis treikam jong ka Mawkynrew C&RD Block.
“Ka SRWP ka hap ïaid lyngba napoh Block bad nga ju kren man ka por ha kaba ïadei bad ki skhim ba lada ki paidbah ki wad RTI nga long uba la kloi ban pdiang namar ïa ka skhim kaba nga ïoh naduh ba ki paidbah ki jied ïanga ha u 2018 haduh mynta ïa ka skhim MLA nga ai haba shit haba shai bad ka long kaba khuid haduh katta katta na bynta ban pyntreikam ha kane ka Block kaba ieit ka jong ngi.”
“Bad ki paidbah ki kmen ba ki ïohi ïa kita kiei kiei baroh ba ïa ki skhim nga la sam haba shit ba shai bad hajuh ka por nga sam shisha na bynta ban kyntiew ïa ka constituency baieit jong nga bad kumjuh ban ïarap ïa kiba dei hok ban ïoh jingïarap bad khamtam ïa kiba duk ba kyrduh ki kup shiliiang ki sem shilliang. Nga nga dei u MLA bad u shakri ki paidbah kidei ki kynrad na kata ka daw kum u shakri nga la pyndep bad pyrshang katba lah ban ai hok ïa ka skhim ka jong nga,” ong u Bah Banteidor Lyngdoh.
Ha kaba ïadei bad ka jingshna thymmai ïa ka ophis treikam jong ka Mawkynrew C&RD Block Block, u Bah Banteidor Lyngdoh u la ïathuh ba ïa ka Mawkynrew C&RD Block la sdang naduh u snem 1981. “Ïa ka Mawkynrew C&RD Block la sdang ban shna naduh u snem 1981 bad kumba ka long mynta ka la jot la pra bad kam long shuh ban shong ki nongtrei bad u BDO kiba la ud na ka por sha ka por. Bad mynta kum u MLA nga dap da ka jingsngewkmen ba la buh ïa u mawnongrim ban shna thymmai noh ha ka jinglut kaba kot sha ka 2 klur tyngka.
“Kum u MLA nga dap da ka jingsngewkmen ba ïa kane ka ophis treikam yn sa shna thymmai noh. Ka jingdon jong ki Block ka pynïajan ïa u paidbah kiba donkam na ka por sha ka por, bad lada kam biang ka ophis treikam ban buh ïa ki kot ki sla ban pynbit pynbiang ka long ka jingthut ha baroh ki liang. Ngi sngewkmen mynta namar kadei ka sngi kaba kyrpang ka sngi kaban pynsah jingkynmaw ïanga kum u MLA bad kumjuh ïa ki paidbah nongshong shnong,” la ong u Bah Banteidor.