Plie u MLA ka Jowai ïa ka jaka set kali, ka JCB bad ka kali kit ñiut thymmai ka JMB

Jowai, Naiwieng 15: U MLA ka Jowai Constituency ma Wailadmiki Shylla mynta ka sngi ula plie ïa ka jaka set ïa ki kali (trok), kumjuh ïa ka puh shilum JCB bad ka kali kit ñiut thymmai (Refuse Compactor) ka Jowai Municipal Board (JMB) ha ka jingïalang bala pynlong ha phyllaw jong katei hi ka ophis kaba don ha shnong Khimusniang, Jowai.
Ha kane ka sngi la wan ban ïadonlang u Deputy Commissioner bah B.S. Sohliya, IAS, u Chairman Jaiñtia Hills Autonomous District Council (JHADC) Dr. Sankey Shangpung, u Chairman Jowai Municipal Board ma Lasooki Lakiang, ka CEO Jowai Municipal Board kong B. Blah nalor kiwei de.
Ïa katei ka jaka set kali jong ka JMB la tei lyngba ka skim hapoh ka Grant in Aid Capital Asset 2020-2021, katba ïa ka JCB bad ka kali (Refuse Compactor) la pynïoh lyngba ka skim 15th Finance Commission 2020-2021 bad ka CC Flooring hapoh ka 14th Finance Commission 2020-2021 kiba la kot haduh Rs.1,13,000,00/- tyngka.
Na ka liang u ma Wailadmiki Shylla haba ai jingkren ula ïaroh ïa ka Jowai Municipal Board (JMB) kaba la trei shitom ban pyndep ïa ka kamram ha kine ki ar snem ba la dep wat hapdeng jong ka khlam Covid-19, shuh shuh ula pynsngew ïa ki kam pynroi kiba la leh da ka sorkar shi bynta ban pynlong ïa ka Jowai kaba khuid ba suba, da kaba sam ruh ïa ki Dusbin ar rong sha manla ki thliewïing khnang ba yn lah bna pynbynta ïa ki ñiut na kiba pyut bad ki bym pyut.
U Deputy Commissioner bah B.S Sohliya, IAS ula pynsngew ïa ki kam jong ka Shillong Municipal Board ha ka por ba u dang long u Chief Executive Officer ka SMB. U ong ba ïa ka rukom bret ñiut ba thymmai waste management ym pat la ban pyntreikam, hynrei kaba donkam ka long ban pynrung ha ki jingmut jingpyrkhat jong ki nongshong shnong ban long kiba lehkhuid da ka jingïatreilang jong baroh. Hynrei ban jop ïa kane dei ban sdang shwa nala ïing khnang ba ka jingpynmih ñiut kan kham duna.
Ka Additional Deputy Commissioner kaba dei ruh ka Chief Executive Officer, Jowai Municipal Board kong B. Blah kala ai khublei ïa ki kynhun kiba ïatreilang ryngkat bad ka Jowai Municipal Board (JMB) na ka bynta ban ai jinghikai ïa ki paidbah kumno ban pynbynta ïa ki ñiut bad ban pynlong ïa ka sor Jowai kaba khuid ba suba kaba ong ‘Keep Jowai Town Clean Campaign”.
Kala ong lyngba ka jingleit lum ïa ki ñiut na kylleng ka sor Jowai da ka JMB ki don shibun ki kam pynroi ha kylleng ki jaka da kaba pyntip na ka 14th Finance Commission ka JMB kala lah ban pyntrei ïa ka Internal Road mar pyrshah ïa ka DC ophis Wahnangbah Road-Iawmusiang. Na ka 15th Finance Commission Award Basic Grant haduh 24 tylli ki work order la dep ban aiti sha ki dong bapher bapher na kine 17 tylli la dep ban pyntreikam. Na ka bynta ban shna ïa ki paiñkhana Individual Household Toilets (IHHL) ïa ka work orders la aiti haduh 74 tylli napdeng kine 57 la dep ban pyntreikam, katba ïa ki 7 tylli ki Work order ba thymmai ha ka dor Rs. 12000/- kala pyntip ba ïa ki application ban sanction la dep ban pdiang.
Kala pyntip ruh ban shan ïa ki nala um kiba biang kiba lah ban khanglad ïa ka jingtuid ki jakhlia sha ki bynta ka Wah Myntdu ha ki 11 tylli ki jaka hapoh ki dong bapher bapher jong ka Jowai.
Kala ong ba ka ophis kala pyntrei ïa ka welfare scheme lyngba ka DAY-NULM, kata ban seng kam lajong ïa ki kynhun SHG bad kin ïoh ïa ka pisa (fund) kaba Rs. 10,000/- bad kiwei de ki lad jingïarap (fund) lyngba ka Self employment program kin don haduh 30 ngut ki nongïoh myntoi kin ïoh ïa ka jingïarap kum ka loans haduh 2 lakhs marwei.
Ban ïarap ïa ki nongdie jingdie ha ki lynti iaidkjat kala pynsngew lyngba ka PM Svanidhi scheme kin don haduh 30 ngut ki nongïoh myntoi da kaba kin hap ban siew na ka bynta ka 1st Installment kaba Rs, 10,000/- marwei. Kala pyntip ruh ba ka Jowai Municipal kala dep pynlong ïa ki prokram ai jinghikai ha baroh ki dong hapoh ka Sor Jowai bad ha ki 17 tylli ki Schools. Kane ka prokram kan dang ïai bteng ban pynlong ha ki schools, ki jaka ïew bad hapoh ki dong.
Ha kane ka sngi la pynkup burom ruh ïa ki kynhun treimon sngewbha kiba kynthup ïa ka Society for Urban and Rural Empowerment (SURE), Young Minds Collective (YMC), Bharat Scout and Guide, ka Synjuk ki Waheh Shnong bad kumjuh ïa ki riew shimet. La sam ïa ki Dustbin sha ki jaka pule naduh ki skul bad ki College.
Katba na ka liang u ma L. Lakiang, Chairman Jowai Municipal Board, u Dr. Sankey Shangpung Chairman JHADC haba ai jingkren kila pynsngew halor ka jingeh kiba mih na ki ñiut ha Jowai, kumta ki khot ka jingïatreilang na ki paidbah ban pynlong ïa ka Jowai kaba khuid ba suba.