Lada jop bun ka UDP u Bah Metbah un long u Myntri Rangbah ba thymmai

Shillong, Naiwieng 13 : U MLA jongka Mawlai Constituency u bah Process T Sawkmie ula pynpaw ka jingsngew kmen kaba khraw ba un ïakhun ha kane ka kynti na ka Seng Saiñ Pyrthei United Democratic party (UDP) bad ka daw bah ka dei ba kane ka party ka dei ka seng riewlum bad kan phai khmat beit sha ki mat kiba ktah ïa ka im ka iap ka jaidbynriew.
Haba ïakren bad u Mawphor u bah Sawkmie u la ong “ Nga rai ban ïakhun na ka UDP halor ki mat jongka jaidbynriew namar nga tip shai kumba ngi don tang para ma ngi ki trai jylla ngin pyrkhat beit ïa ki mat kiba ktah ïa ki jaidbynriew riewlum rit paid namar ngim donkam ban da ïoh jingmynjur na shalor kumba long kiwei ki party ba hap ïoh bor ne jingmynjur beit na Delhi nalor kata nga ïohi ruh ba ka don ka jingïatylli bad ïalong kawei hapoh ka UDP”.
Shuh shuh u la ong “ Kumba long mynta ki paidbah ki kwah ban ïohi ïa ka jingkylla bad ki kwah ruh ban ïoh ïalam ïa ka sorkar ba thymmai ha u 2023 da ka UDP. Namar katba nang mih ki sngi ka UDP ka la nang khlaiñ nang khlaiñ bad bun ruh kiba kwah ban ïoh tiket na ka UDP”.
Nalor kata u la ong ba ki paidbah ki la sdang ruh ban ïakren shaphang ka kam Myntri Rangbah ha ka jylla khamtam shaphang u President ka UDP bad lada U Blei u kyrkhu ba ka party kan jop bun khlem pep hi u bah Metbah Lyngdoh uba dei u President un shimti beit ïa ka kam Myntri Rangbah ba thymmai ha ka jylla.
Khatduh u bah Sawkmie u la ong “ Nga kyrpad ïa ki paidbah ka jylla ban ailad ïa ka UDP ban jop don burom khnang ba kan ïoh ïalam ïa ka sorkar kumba la thrang da baroh ha u 2023. Ki paidbah ki la ïoh mad kumno ka long haka por ba ïalam ïa ka sorkar da ka Congress bad kumno ka long haba ïoh ban ïalam da ka NPP ruh. Kumta ailad ban ïalam sa ka UDP khnang ba ki paidbah kin sa ïohi ba kan don beit ka jingkylla kaba khraw ha ka jylla ha baroh ki liang”.