Hapoh shitaïew ai por ïa u Dolloi ka Elaka Nongtalang ban khot Dorbar jied Waheh Shnong ha Bakur

Jowai, Naiwieng 13: Ki paidbah ka Dorbar Shnong Bakur kaba dang hap hapoh ka Amlarem Sub-Division West Jaiñtia Hills District, kawei na ki shnong kaba don hajan khappud bad ka Ri Bangladesh ha kane ka sngi saitjaiñ kila ïalum lang bad ai por hapoh shi taïew ïa u Dolloi ka Elaka Nongtalang ban khot noh ïa ka Dorbar jied Waheh Shnong ba pura.
Lada ym lah ban leh ïa kane kim banse ban leit ujor syndoh sha ka ïing bishar ba don burom bad kin pynlong ka jingmih paidbah ha shnong Bakur, da kaba pynsngew la kumno kumno hapoh jong une u bnai dei ban ïoh beit ïa u Waheh Shnong ba pura ha ka shnong Bakur.
Kine ki paidbah nongshong shnong kiba don kumba 50 eiei naduh ki longkmie bad ki longkpa kila shim ka jingïakynduh lang ha Dorbar Halls jong ka shnong kaba don ha syndah ka Khasi-Pnar Secondary School L.P, U.P & Sec. Section Bakur (Dawki).
Halor kane ka jingeh jong ki na ka jingbym don u Waheh Shnong ba pura, haba ïakren bad ki lad pathai khubor mynta ka sngi la ïathuh ba ka term jong u ma Wespar Lamin Acting Waheh Shnong kala kut noh la shi bnai tam mynta.
Katkum ka jingïathuh jong kitei ki nongshong shnong ka daw jong ka jingpynslem ban jied ïa u Waheh Shnong ba pura ka long namar ka jingbym shimkhia jong u Dolloi jong ka Elaka Nongtalang wat hadien ba ki bor jong ka Jaiñtia Hills Autonomous District Council kala dep phah jingthoh sha u Dolloi ban pynlong noh ïa ka jingjied Waheh Shnong da kaba pynlong ka jingthep Vote (Secret ballot).
U ma Lasborn Surong kum u nongshong shnong ula ong haka jingïadei bad ka jingbym ïaid beit jong ka Dorbar jied Waheh Shnong kaba la long haka 8 tarik April 2022, na ka liang ka District Council kala dep ban khot hajir ïa u Dolloi haka 13 bnai jong u May, 2022 da kaba pynmih syndon ka hukum ban pynlong Election thymmai ha ka 30 June 2022.
Hadien ba la pynbeit ïa katei ka tarik la pynjlan biang ïa ka bad la pynbeit ban pynlong noh ha ka 9 tarik mynta u bnai bad na ka liang u Dolloi ula pan por ban pynlong ha ka 14 tarik bad hadien kane ula pynhiar ïa ka tarik ban pynlong mynta ka sngi 12 tarik hynrei kane ruh kam shem la urlong satia, kaba la buh ha ka umdum ïa ki paidbah na ka daw ka jingleh jong utei u Dolloi.
La ïathuh ba kane ka jingbym don ïa u Waheh Shnong ba pura kala buh jingeh ïa ki paidbah wat ïa u khaw rashon kumjuh, da kaba u ong ‘kumno ngin leit thep kyrteng ban pynthymmai Dealer’ naduh ka 16 tarik mynta u bnai haba khlem u Waheh Shnong ba pura bad kane ka jingpynslem ban pynlong Election Waheh Shnong ka paw ba don eiei sha lyndet halor kane ka jingleh jong u Dolloi.
Shuh shuh u ma Surong ula ong haba ngi leit donkam sha ki ophis sorkar, kiba bun hi kim pdiang ïa ka Residential Certificate ba la issue ha ka kyrteng Acting Waheh Shnong bad kane ruh ka buh jingeh ïa ki paidbah ka shnong.
Kawei na ki longkmie ka kong B. Lamin kala ong ‘ngi la shem jingeh bha mynta na ka jingbym ïoh ïa u Waheh Shnong ba pura, ha ka jingshisha ngi donkam mynta ïa u Rangbah Shnong uba ïoh ïa ka sanad na ka District Council namar ka jingeh ba hakhmat ka long ïa u khaw Rashon namar ym lah ban thung Dealer khlem jingbit jong ki paidbah nongshong shnong. Sa kawei ruh ka jingpyntrei ïa Job Card ruh kala dkhot bha bad ka shnong ka la duh nong da ki klur tyngka bad shano ka lawei jong ka shnong, la buh jingkylli katei ka longkmie.
Kum ka nongshong shnong jong ka Bakur ka kyntu ïa ki bor ka District Council bad kumjuh ïa u Dolloi ba kin shimkhia ban pynbeit noh mardor ïa kane ka kam hapoh kane ka taïew (san sngi) khang ba yn ïoh jied pura ïa u Waheh Shnong wat lada dei uno uno napdeng ki nongshong shnong.
Kala ong balei kumne “tarik shi tarik” la pynban ban pynlong ïaka Dorbar jied Waheh Shnong hynrei kam urlong shatia bad kala long kum ba ak phlim bad lada kane ka dang ïaijia kim banse ban mih shakhmat ban dawa ïa ka hok.
Ka buh ka jingkyntu ïa ka District Council kaba dei ka kmie kaba don ïa ka bor ba kam dei ban peit shilliang khmat ïa kane ka jingeh jong ka Shnong Bakur, hynrei ka dei ban bthah ïa u Dolloi ba un pynlong noh ïa ka Dorbar shnong jied Waheh Shnong khnang ba kan pynsuk ïa ka shnong kiwei de ba kren ki long u ma Sylvester Khonglah bad u ma Standy Khongnoh.