Shillong, Naiwieng 08: U State President jong ka NPP uba dei ruh u MP Rajya Sabha u Dr WR Kharlukhi u la ong ba ka jingleit pynïasoh u Dr Mukul Sangma sha ka TMC ka dei ka jingleh kaba u la bakla jur.
U la ong ruh ba u Dr Mukul kumba long mynta u la kylla long tang u nongkyrshan jong kiwei pat ba kin ïoh shong ha ka khet.
“Mynba u dang don ha ka Congress u dei uwei napdeng ki nongïalam uba don jingkyrmen ban ïoh shong ha ka khet hynrei mynta u hap hun ban shu kylla long tang u nongkyr shan kiwei pat ba kin ïoh shong ha ka khet” u la ong.
U la ong ruh ba ka jingleit pynïasoh jong u Dr Mukul ka dei ka jingleh bakla kaba khraw bha.
“Dang shen nga la ong ba u Dr Mukul u dei u riewsaiñ pyrthei uba la ih bha ka rta bad uba yn ym bakla jam bad nga la ong ruh ba u Bah Vincent u dei ba la ih ka rta bad un ym ai lad ba u Dr Mukul un leh bakla hynrei kaei kaba la jia mynta ka long pynban mar khongpong ïa kaba nga kren,” u la bynrap.
