Nongstoiñ, Naiwieng 7: Ka jingpyntrei ïa ka surok Nongstoiñ-Rambrai-Kyrshai-Chaygoan ïa ka bynta kaba nyngkong (phase 1) ïa kaba la pyntrei da ka Kompani Spaica na Jharkhand, ka la ïaid shait shait mynta khamtam ha kaba ïadei bad ka jingpynheh ïa ka surok ban ot bad puh ïa ki lum ki wah.
Na ka liang jong u bah u bah Robertson Bamon u ba dei u Site Engineer ka NHIDCL, u la ïathuh ba ka jingot bad puh ïa ki lum na ka bynta ban pynheh ïa ka surok, ka la dep kumba 75 na ka 100 bad mynta ka sah sa tang ha ki katto katne tylli ki bynta hapoh ki shnong ha sor Nongstoiñ ban pyndep.
Shuh shuh, u la ong ruh ba la khmih lynti ba la kumno kumno ha u snem ban wan yn ïoh sdang noh ban sïang maw bad siang rong ha ki katto katne tylli ki bynta jong katei ka surok. U la ïathuh ruh ba nalor ka jingpyntrei surok katei ka Kompani ka ïarap ruh ha kiba bun ki jingdonkam jong ki shnong ki thaw.
Kumba ka paw mynta, katei ka Kompani ka la ïarap ruh ban pyntheh khyndew hapoh ka Madan shnong Tiehsaw bad ban shna pynbha ruh ïa katei ka madan, khlem kano kano ka jingsiew nalor kiwei kiwei de ki kam ïarap da katei ka Kompani.
Ha kaba ïadei bad ka jingling la kloi jong katei ka Kompani ban ïarap shna pynbha ïa ka Madan shnong Tiehsaw na ka liang jong ka Dorbar Shnong Tiehsaw kala pynpaw ïa ka jingsngewkmen bad sngewnguh ïa ka katei ka Kompani kaba nalor ka jingpyntrei ïa ka surok ka la leh ruh ïa ki kam ba bha na ka bynta ki shnong ki thaw.
Na ka liang jong u Sordar ka shnong Tiehsaw u bah M. Dkhar, u la ong ba lada ka shnong ka pyntrei hi ïa katei ka Madan, ka jinglut kan kot palat 30 lak tyngka. Hynrei lyngba ka jingïarap lang katei ka Kompani kaba pyntrei surok, ka la long ka jingkyrkhu ïa ka shnong ka thaw baroh kawei.
U bah Dkhar u la kyntu ruh ïa ki khun shnong khun thaw ba kin ai ka jingïatreilang bad katei ka Kompani, khnang ba katei ka project shna surok kan long kaba ïaid beit ïaid ryntih bad ba kan ym don kano kano ka jingpynthut ïa ka shongsuk shong shngaiñ jong ki nongtrei katei ka Kompani.
“Ngi la sakhi lyngba ki lad pathai khubor ba haba ki Kompani ba na bar ki wan ban pyntrei ïa kino kino ki project ha kane ka Jylla, ki don kiba shah pyndik shah byrngem bad shah thang ki kali. Kumta ter ter hynrei kane ka jingleh sniew kan wanrah pynban ka jingduhnong ïa ngi hi bad kan long kumba ngi leh beiñ lajong ïala jong”, u la ong.
Ha kawei pat ka liang, u bah M. Dkhar u la pynpaw ruh ka jingsngewnguh kaba khraw ïa u MLA ka Nongstoiñ u bah Macmillan Byrsat, u ba la ïakhun ban pynneh ïa kane ka surok naduh ka 0 kilometer haduh 5 kilometer, kaba ka la don ka jingpynkynriah ban lait noh na kane ka surok bah ar laiñ kaba ïaid lyngba ki saw tylli ki shnong hapoh ka sor Nongstoiñ.
