Ki jingbam ba paka kim dei ban long ki jingbam kiba rem dor: D.B.S. Mukhim

Mawkyrwat, Ïaïong 04: Hadien ka jingïoh jingujor na kiba bun ki paidbah ba la kynnoh ba u khaw ba la sam ha ki skul ne ha u khaw Mid-day Meal u dei u khaw ba la khleh lang bad u khaw plastik, hynrei em kam dei kumta, bad u dei u khaw ba la khleh lang da ki kynja vitamin u ban long ka jingtei ïa ka met jong ki khynnah.
Ka kong D.B.S. Mukhim, Assistant Commissioner of Food Safety jong ka East, West & South West Khasi Hills District mynta ka sngi ha ka jingïalang ba la pynlong da ka ophis jong ka Deputy Commissioner (Supply), South West Khasi Hills District hapoh jong ka Multipurpose Hall, DCs Office, Laitlawsang, ka la ong ba ka sorkar haba ka ai ki kynja marbam mardih kam ju ai da u ba sniew ne uba ktah ïa ka koit ka khiah jong ki paidbah. Namarkata, une u khaw ba la kynnoh ba u dei u khaw plastik u dei u khaw ‘Fortified Rice’ uba don ha ka ïa ka vitamin kum ka Iron, Folic Acid bad Vitamin B12.
Kumta une u khaw uba ki paidbah ki la ujor, na ka liang ka tnad jong ka ophis Supply ka la shimkhia bad leh ïa kaba donkam bad la dep ruh ban test ruh, khnang ba ki paidbah kin nym don ka jingartatien ba bam ne ban shet ïa u khaw. Ka la ong ruh ba ka sa mih ka jingujor ka dei namar ka don ka jingbymlah jong ka Sorkar ba ai ki jingpynshai ha ka por kaba biang, hynrei da ka jingsngewkhia, mynta ka sngi ka la ïoh ban khot lang ïa ki paidbah jong ka South West Khasi Hills District ban ïoh ban pynshai bad ka la long da shisha ka jingpynhun ïa ki kumba ki ki kwah.
Ha kaba ïa dei bad une u khaw ‘Fortified Rice’, ka kong Mukhim ka la pynshai ruh ba ban ïarap na ka bynta ki khynnah ba kin ïoh ïa ka jingkhlaiñ ha ka met, kumta ha u khaw ba la sam sha ki skul la thep lang ïa u ‘Fortified Rice’ 1 kilo na ka 100 kilo u khaw ba ju bam. Shuh shuh ka la batai ruh ïa ka kyntien ‘Fortification’ ka dei ka kyntien ban pynkhlaiñ ïa ki jingbam bad kumta ruh ka long ha une u khaw ba la kynnoh ba u dei u khaw plastik namar u pher ka jinglong.
Ka la pynshai ruh ba ka Food Safety Standards Authority jong ka sorkar India ka la shim ïa ka synjam ban khleh ne pynkhlaiñ ha ki 5 jait jingbam ba ngi ju bam manla ka sngi ha kaba ngim lah satia ban lait kum u khaw, ka mluh, ka umphniang, u ata bad u moida.
Namarkata, ka la kyntu ba nangne shakhmat lada ki ïoh ïa kiba kum kine ki jingujor, kim dei ban shu tip tang para ma ki hynrei mar mar wan shakhmat ban ïathuh ne complaint hapoh ophis DC khnang ba yn lah ban leh ïa kaba donkam na ka bynta ka jingbha lang jong baroh.
Ka la pynkynmaw ruh ïa ki paidbah, ba ban ïoh ïa ka met kaba koit ba khiah ka donkam ruh ban bam ïa ki jait jingbam kiba bun jait da kaba ong, “Ki jingbam ba paka kim dei ban long ki jingbam kiba rem dor, hynrei ki dei ki jingbam ne ki jhur kiba ïoh na ka mei mariang” bad ban ïoh ïa ki ka long kaba donkam ba ki paidbah nongshong shnong ki dei ban sumar bha ïa ka mariang ym ban shu pynjot ne pom pathar ïa ki dieng ki siej bad kiwei ki jingpynsniew.
Ka la pynkynmaw ruh ba ka jingbam ka dei u bud lum jong ngi ki briew bad namarkata, ka la ai jingmut ruh na ka bynta ki paidbah ha kiba bun rukom, ha kaba ïa dei bad ka shet ka tiew ban long ka jingïarap na ka bynta ki khun ki kti bad ki dei ban long kiba im jingmut ban pynlut pisa ha kiba bun ki jingbam ba tei met khnang ba kan ïarap ban ym pynlut than ïa ka pisa ha ka bai dawai da shin. Ka la ban ruh ba ka khuid ka suba ka long kaba donkam tam bad wanrah ïa ka khuid ka suba ha kylleng ki jaka ka dei lyngba ka jingïatreilang baroh ki paidbah.
Na ka liang ka Deputy Commissioner, South West Khasi Hills District, kong C. Kharkongngor, IAS pat ka la pynkynmaw ba ngi dei ban bam ban im, ym ba ngin im tang bam bam namar ïoh ka poi sha ka jingshitom. “Ban ïoh ïa ka met kaba khlaiñ bad kaba koit ba khiah ka donkam ïa ngi ban bam ïa ki kynja jhur ba bun jait kiba ka mei mariang ka ai ha ngi bad ban ïoh ïa ki ngim dei ban pynjot ïa ka mei mariang, hynrei dei ban sumar khuid ïa ka”, ong ka DC bad ka pliang ja jong ki ka dei ban don buh ki jait jhur ha ka dur jong u sim-pyllieng.
Kumta lyngba kane ka jingpynshai mynta ka sngi kam dei ban kut tang ha kine ki saw kynrong jong kane ka hall, hynrei ma ki ki dei ban long ki nongrah bad pynshai lem ha kiwei de ki para shnong para thaw.
Ha kane ka sngi la wan ïashimbynta lang naduh ki nonghikai skul, ki rangbah Shnong, ki longkmie bad ki nongïalam jong ki seng bapher bapher, ki SHG bad kiwei kiwei de. Ïa ka jingïalang la pynïaid da u bah F.B. Khongnoh, Sub-Inspector (SI) Supply, South West Khasi Hills District.