Bun ki kren beiñ bad klet noh ïa ki nongrim ba skhem ka HSPDP: Badariti

Nongstoiñ, Naiwieng 3: “Ka jingkren beiñ jong ki briew ha ki snem ba la dep, khamtam ha u snem ba u (L) Maieit Hopingstone Lyngdoh u dang shu khlad noh na kane ka pyrthei, da kaba ong ba katto ka HSPDP ka la kut namar bad la tep lang ïa ka ha lum jingtep ha ka shnong jong u ha Mawkyllei, hynrei kam shym la long kumta”, ong ka kong Badariti Lyngdoh Nonglait ka khun pyrsa trai jong u ha ka jingïalang kaba la long ha ka shnong Nonglang West Khasi Hills dang shen.
Ka kong Badariti ka la ong ruh, “Ka jingkren beiñ jong ki ka dei namar ba kim tip ei ei ba mynshuwa eh ki hynriew phew ar tylli ki shnong kiba don ha ka hima Nongmynsaw, ki dei kiba la synshar da ka Assam hynrei u (L) Maieit Hopingstone ha u snem 1956 u la ïakhun tyngeh ban pynrung biang ïa ki ha ka United Khasi & Jaiñtia Hills District. Hadien ba u (L) Maieit Hoping u la khlad noh, ka party HSPDP ka la tynrong ïa ka kam kum u nongïalam ha uwei u rangbah u ba ki paitbah ka jylla ki la shaniah bad burom lut ïa u. Hynrei khlem poi pyrkhat ba hadien utei u nongïalam u kylla long pynban u nongpynpait pynpra bad u nong pynjot ïa ka party”.
Ka kong Badariti ka la pynkynmaw shuh shuh ba ka jingkren jong kiwei ki party da kaba ong ba ka HSPDP kam shym la leh ei ei ha kine ki sanphew snem, ka dei ka jingkren kaba ki paitbah kim lah ban pdiang namar ki dak ki shin ki kdew bad ki sakhi ba ki surok, ki skul, ki Hospital bad kiwei kiwei ki la don naduh ka por ba u (L) Maieit Hopng u dang im.
Ka la ong ruh ba jin lada ki nongmihkmat kiba don mynta, ki dei kiba pyntreikam hok ïa ki skhim ba ka sorkar pdeng ka la ai sha ka jylla ïa baroh ki surok ha West Khasi Hills la lah ban siang wat da ka rong ksiar ruh. Ka la ong ba ha kine ki sngi hadien ka jingïakhih jong ki nonghikai bad ki sengbhalang ha Shillong, ki la don ki seng jong ki dkhar kiba la dawa na ka sorkar ba kan pyntrei kam noh da ka Arms Forces Special Power Act, khnang ba yn ym don shuh ba nud ban pynlong ïa ki jingïakhih paitbah, namar haba la pyntrei kam ïa katei ka aiñ lada ki shipai ki suba ïa uno uno u briew ba u dei u nongleh kam sniew u tang shu mih na ïing ban leit trei leit ktah ki la siat beit khlem jingmap.
Ka la pynshai ruh ba ka jingpyntrei kam ïa katei ka aiñ ha Manipur ka la ktah haduh katta katta ïa ki paitbah. Ki longïing longsem ki pait dohnud haba ki ïohi ba ka snam jong ki khun samla ka tuid ha madan na ka jingsiat jong ki shipai, tang mar ba ki suba sniew khlem don kino kino ki sakhi ban pynshisha bad lada kan jia kumne ha kane ka jylla hato ki paitbah ki sngew kumno.
Ka la pynkynmaw ruh ba ha u bnai ba Risaw ba la dep ha ka por puja jong ki dkhar ha Shillong, ki dukan kiba plie ki don tang 40% te hato lada ka long kumne kaei ka ban jia ïa ka lawei jong ka jaitbynriew. Bun kiba ong ba tang ka West Khasi Hills ka dei ka District kaba dang don shisha ïa ki riew ieit ri namar haba ïakhih ILP, them Metor bad kiwei kiwei ki nongwan ïashim bynta ki bun na West Khasi Hills. Hynrei ha phai ha Shallang pat ha kine ki sngi ki trai shnong ki la long shakri lut, namar ba ïa ka kamai kajih la knieh lut da u bar jylla.
Ka la ong ba lada ki paitbah Khasi Pnar ki sngewthuh, ka por ka la dei ban kyndit bynriew bad ban ym ailad ba kine ki nongmihkhmat kiba kwah tang ban lum spah ïalade kin wan biang ha ka bor.