Shen yn sdang ka Assam Meghalaya ïa ka bynta ba ar jong jingïakren pynbeit pud

Shillong, Ïaiong 04: Ka Sorkar Meghalaya bad Assam kin sa sdang noh shen ïa ka bynta ba-ar (second phase) jong ka jingïakren ban pynbeit noh ïa ka jingïakajia pud sa ha ki 6 tylli ki jaka ba dang sah ba kynthup ïa ka Block-I bad Block-II.
Ïa kane la pyntip da u Symbud Myntri Rangbah ka Jylla Bah Prestone Tynsong hynne ka sngi nyngkong haba kylli la ki sorkar jong ki arJylla kin ap ïa ka jingmynjur jong ka Ïingdorbar Parliament halor ka Memorandum of Under standing (Mou) bala iasoi ha New Delhi ha ka 29 tarik Lber ban sdang pat ïa ka bynta ba-ar jong ka jingïakren.
“Ngam ïohi ba ngi donkam ban ap tad haduh ba ka Survey of India kan pyndep ïa ka kam ban ruid lain thymmai ïa u pud u sam ki ar jylla hynrei ngi lah ban nang jam shakhmat sha ka bynta ba ar jong ka jingïakren ban ïapynbeit pat sa ïa ki 6 tylli ki jaka ba sahteng” ula pyntip sha ki nongthoh khubor.
U Bah Prestone ula ong ba kam long satia kaba donkam namar hadien bala iasoi ïa ka MoU, ka sienjam ba bud ka long ba ka Survey of India kan sa sdang ïa ka sorjamin da kaba pyniadonbynta lang ïa ka Sorkar Meghalaya bad Assam.
“Ka Survey of India kin sa wan, ki Ophisar na ka Sorkar Meghalaya bad Assam ruh kin sa iadonlang-kine kin hap ban pyndep ïa kane ka kam namar la dei ban iasoi ïa ka MoU. Kat kum ka MoU, kin sa leit ruid thymmai ïa u pud u sam Bteng Sla 7hapdeng ka Jylla Assam bad Meghalaya” ula ong.
Na ki 12 tylli ki jaka ba ïakajia, haduh 6 tylli ki jaka ki dei kiba la dep ban pyndep da ki ar jylla ba kine ki kynthup ïa ka Tarabari (4.69 sq km), Gizang (13.53 sq km), Hahim (3.51 sq km), Boklapara (1.57 sq kms), Khanapara-Pilangkata (2.29 sq kms) bad Ratacherra (11.20 sq kms).
Ki 6 tylli ki jaka ba dang sah ki kynthup ïa ka Langpih, Bordwar, Nongwah Mawtamur, Deshdemoria, Khanduli, Umkhyrni Psiar, Block I bad Block II.
Haba kubur ba ka bynta ba-ar jong ka jingïakren kan long kaba satar bha, u Bah Prestone ula ong ba lada ki briew na ki ar jylla ki burom ïa ka rai bala shim da ki ar Sorkar “Nga thikna ba ngin lah ban pynbeit ïa kane ka jingeh baroh”.
Haba kylli halor ka Block-I bad Block-II, u Symbud Myntri Rangbah ula kam ba kam don satia ka jingkylli halor ka jingïakajia ne ka jingïapher jingmut hynrei ka dei ka kam ba shu “pynphai biang” (retransfer) haba phaikhmat sha ka Block-I bad Block-II.
“Phin hap ban sngewthuh ïa kawei ka jingdonkam ba lada phi ïakren halor ka Block-I bad II, ka dei ka kam ban shu pynphai biang. Kam don satia ka jingïakajia” ula ong haba bynrap “Hynrei ngam ïathuh lut ïa kiei kiei baroh namar ngim pat jam sha ka bynta kaba ar jong ka jingïakren”.