Shillong, Iaiong 4 : Ka die ka thied phan, kubi bad kino-kino ki mar khaïi, ka don bad ka dei ban don ha kylleng ki ïew ki hat bad ki shnong ki thaw, kumba ju long ka rukom. ïa ka die ka thied buit te kaba dei ban ïa sumar bad husiar bha, namar la mih ha ki kot khubor dang ha kine ki sngi bad man ka por, ïa ka jingrung ki khyllah jait nabar jylla, sha ki thaiñ bad ki ïew nongkyndong ba ki leit tyrwa ïa ki mar ki mata. Dang shu ïohi ba sha Nongstoin ki la don kiba kum kine.
Balei ki District Council ki thaw ïa ka aiñ pyrkhing ïa ki mahajon mynder? ïa kane ka aiñ la thaw bad pynjari naduh u snem 1954 da ki rangbah jong ngi kiba la ïohi jngai ba donkam ban ïada ïa ki nongkhaïi trai shnong barit, na ka jingwan lynshop ki mahajon heh na kylleng. Ban ïada ruh ba kum kine kim dei ban jia, hynrei la jia shisha ha kylleng.
Ki Hima, ki Raid bad ki shnong ki thaw ha kylleng, ki dei ban ïarap bad ïatrei lang bad ki District Council, ban peit bad ban ym ailad ïa kito ki mahajon bun- buit lada ki wanrung sha ki iew ki hat bad ki shnong ki thaw ha ri Khasi-Jaintia, khlem da don laisen khaii ba ai da ki District Council. Lah ban khang ïa ki dukan jong ki lane beh ïa ki kali jong ki bad ban leit pyntip sha ki pulit bad ki bor ka aiñ bad sha District Council halor kane ka bynta.
Ha Jaintia Hills
Dang shibnai tam, la ïohi ba ha thaiñ National Highway Jaintia Hills lei, kita ki bar jylla ki bat bor ïa ki kynthei, da kaba pynbieit ïa ki ba kin rung sha kyndong dukan hana ba bun ki mar ki mata. Ha Shillong bad shawei ruh kum kine ki kam lehse ki ju don, tangba kim nud pynbna. Ki kynthei ki dei ban husiar hi na kum kine ki buit ki mahajon shutia.
Ki khlieh nongsynshar ilaka, kum ki Doloi, ki Syiem, ki Sirdar ne kinongpynïaid shnong kim donbor ban ai laisen khaïi ïa ki mynder, namar ia kane ka kam, dei tang ki District Council kiba don bor. Ki khlieh Nongsynshar kin ïapeit lang bad snoh kti na ka bynta ka jingbha shuwa ban pynkut ïa kane ka bynta, ki kam khaïi ki kynthup lut ïa baroh ki jait kam khaïi, kynthup ïa ki kam kontrak jong ki Contractor ha ki tnat PWD,PHE ne kino-kino, kynthup ïa ki tnat ka Sorkar jylla bad kiwei ki tnat sorkarIndia ruh.
Kumta da ïapeit bha bad husiar ïa kito ki nongkhaïi buit, khamtam hakane ka juk shyrkhei, ïoh shah thep lang ïalade ha ki ruh bad ki byrni.
Ka Skim Svamitva
Dang shen nga la kyrsiew thiah, ban ïatip shaphang kata ka skim ka Sorkar kmie, kaba tang ka kyrteng jong ka ruh, ngam sngewthuh, kata ka ‘SVAMITVA’, ïa kaba la mih ha ki kot khubor ha u kyllalyngkot ( January 11,12 tarik).
La bthah ia ka sorkar Meghalaya ba kan pynbiang khyndew, ka um bad ka jingshai ilektrik sha kumba 6846 tylli ki Shnong, na ka bynta 5 bad 6 snem, ba kin leit shong ki nongtrei ka Survey of India na kylleng bad sha kylleng kitei ki shnong. ïa mynta, kumba 9 bnai shuwa, ba kin thew kin woh ryngkat bad kita ki kotkudi-nar (drone) ki ban her ha suiñ ban phah jingtip pat sha ryngkew.
Nga la sei bad kren ïa kane ka mat ba kynsha ha ka dorbar jong ka District Council ha u bnai ba la dep bad baroh ki pynpaw ïa ka jinglyngngoh, ka skim aiu kane.
Kaba sngewhun ka long ba u Bah Titos Chyne CEM ula pyntip sha ka Sorkar Meghalaya ba ka District Council kam don khyndew bad kam lah ban hukum ïa ki Hima, ki shnong ki thaw halor kane ka bynta, namar ïa ka khyndew, long trai da ki paidbah bad dei ki khlieh Nongsynshar bad ki Dorbar Shnong kiba pynbeit ïa ki kam synshar-khadar ha ki elaka jong ki. Baroh-baroh ki dei ban shim lang ïa ka jingkit khlieh ïa kum kine ki jait kam, kiba sdang ban bsuh da ki dur bula.
