4 sien shitaïew yn pynher liengsuiñ ban pynïasoh ïa ka Shillong-Lilabari hapoh ka RCS-UDAN

Shillong, Risaw, 30: U Myntri ka tnat Civil Aviation, u Jyotiraditya M. Scindia ryngkat bad u Myntri Khynnah u Gen. Dr. Vijay Kumar Singh (Rtd.) ki la plie paidbah ïa lai tylli ki jingpynher liengsuiñ ba la pynïasoh ïa ki san tylli ki nongbah jong ka jylla Assam, Arunachal Pradesh, Meghalaya, Manipur, bad Mizoram.
Ka jingpynïasoh lyngba ki liengsuiñ ha ki nongbah rilum jong ki san tylli ki jylla ka thaiñ Shatei Lammihngi jong ka ri India kan long ka bynta kaba kongsan ban wanrah ka jingsuk ha ka rukom im ki briew jong ka thaiñ bad kan kyntiew ïa ki kam jngohkai bad ka khaii ka pateng.
U Jyotiraditya Scindia haba kren ha ka jingïalang, u la ai khublei ïa ki paidbah nongshong shnong ka thaiñ Shatei Lammihngi da kaba ong ba kane ka sngi kan dei ka sngi kaba kyrpang ba ka Sorkar Pdeng ka la shim ïa ka sienjam kaba kongsan ha kaba ïadei bad ka jingpynïasoh lyngba ki liengsuiñ sha mala ki bynta jong ka ri.
U la ong ruh ba ka Sorkar Pdeng ka la phaikhmat kyrpang halor ka jingpynïasoh lyngba ki liengsuiñ na ka bynta ka thaiñ Shatei Lammihngi. Ha ki phra snem ba la leit, la kyntiew kyrdan hynniew tylli ki kad liengsuiñ ha ka thaiñ. Hapoh ka skhim UDAN, 14% ki lynti pynher liengsuiñ la mang na ka bynta ka thaiñ Shatei Lammihngi. Hapoh ka UDAN 4.2, kumba 18% tylli ki lynti ïaid liengsuiñ la mang na ka bynta ka thaiñ Shatei Lammihngi. La mang pisa T. 500 klur na ka bynta ka jingpynïasoh liengsuiñ ha ka thaiñ Shatei Lammihngi. Hapoh ka Krishi UDAN, 25 tylli ki kad liengsuiñ ki la ïoh jingmyntoi ha ka thaiñ.
U Myntri u la pynbna ba hapoh ka International UDAN, artylli ki lynti ïaid liengsuiñ Agartala-Chittagong-Agartala bad Imphal-Mandalay-Imphal kin sa sdang treikam ka ban pynïar ïa ka kam pynïasoh liengsuiñ ha ki jylla ka thaiñ Shatei Lammihngi na ka kyrdan National sha ka International.
U Myntri Khynnah u Gen. Dr Vijay Kumar Singh (Rtd.) u la ong ba ka long ka bynta kaba sngewtynnad ba la lah ban pynïoh shuh ïa ka jingpynïasoh lyngba ki liengsuiñ na ka bynta ka thaiñ Shatei Lammihngi jong ka ri. Kane kan pynsuk ïa ka leit ka wan hapdeng ki jylla bad kan ïarap ïa ki briew kiba leit jingleit na ka bynta ki kam bapher bapher kan noh synniang sha ka roi ka par jong ka thaiñ.
La plie ïa ka jingïalang da u Myntri Rangbah ka Arunachal Pradesh u Pema Khandu, u Myntri Rangbah ka Manipur u N. Biren Singh, u Myntri Rangbah ka Assam u Hemanta Biswa Sarma, u Myntri Rangbah jong ka Meghalaya u Conrad K Sangma lyngba ka Video message ba la rekod lypa, u Myntri ka Sorkar Pdeng ba khmih ïa ka tnat Law and Justice u Kiren Rijiju bad kiwei kiwei ki Myntri bad ki MP na ki jylla.