Shillong, Risaw 27 : Kum shi bynta ban pynmih pisa na bynta ban nang kyntiew ïa ki samla ïalehkai jong ka dong ka thaiñ Shella, ka Young Blood Sports Club (YBSC) Sohlap-Umdoh- Mawpot, Shella ka la pynlong da ka jingïalehkai phutbol (Exhibition Match) myn ha ka 25 tarik Risaw 2022 ha Sohlap, Shella.
Ka jingïalehkai phutbol ka la long hapdeng ka PFR Academy, Shillong pyrshah ïa ka YBSC Footbal Team, ha kaba bun na ki paidbah na Shnong bad ki shnong ba Marjan ki lah wan ban sakhi bad kyrshan ai ka jingkyrshan ïa katei ka sienjam ba la shim da ka Club.
“Kum ka club ngi don ïa ka thong ban kyntiew ïa ki khun samla kiba don ïa ka sap ha ki jingïalehkai bapher bapher bad khamtam eh ha ka ïa jngi (swimming) bad ngin ïai trei shitom ban pynurlong ïa ka jingthrang jong ngi ba ki samla napoh Shnong kin wanrah takma bad ka nam ka burom ïa ka shnong Shella bad ïa ka jylla hi baroh kawei,” ong u Komen Laitmon President ka YBSC ha u kyrwoh khubor.
Ka club ka ai khublei ruh ïa ki paidbah nongshong shnong ka shnong Shella bad ki shnong ba marjan halor ka jingkyrshan jong ki ïa ka jingïaid lynti jong ka club.
“Ngi pynpaw ka jingai khublei ïa ki paidbah nongshong shnong ka shnong shella, ki marjan shnong, ïa ka Mawjam SC, HYC Shella Area Unit, Kong Grace Kharpuri, Bah Sotish Youroin bad kiwei kiwei kiba lah noh synñiang sha ka Club kum shi bynta ban pynmih pisa ïa ka Club ba kan lah ban kyrshan ïa ki khun samla ka shnong Shella kiba la pynpaw ïa ka sap ba ki don ha ka liang ka jingïalehkai ïakob Jngi (swimming competitions) ha ki lympung bapher bapher ha ka jylla bad kumjuh ruh ha ki National swimming kum ha Haryana, Odisha, Kolkata, Guwahati, Gujarat bad ba kin lah ban ïashim bynta ha North East Olympics games ka ban long ha ka jylla jong ngi ha ka 10 haduh 16 tarik Naiwieng 2022,” u la ong.
“Ha ka jing ïaid lynti jong ka Club, ha kine ki bnai bad ki snem ba lah dep, ngim lah ban len ba ngi la bun than ka jinglut mynta u snem namar ki khynnah ba shah jied ha ka jingïalehkai ïakob jngi ngi hap phah ban pyntbit shwa ar taïew ei ei ïa ki ha Guwahati ha ki Swimming pool kiba biang ka jingheh 50mts.”
“Ki khynnah samla napoh Shnong Shella, watla ki don ïa ka sap ba kin kiew bad ïalehkai bha ha kane ka liang hynrei sngewsih pat kim don ïa ka jaka ai jinghikai bad kilan met kaba biang. Ki hap ban shah lane hikai hi ha ka wah Shella bad kumjuh ruh ngim lah ban buh ïa u coach uban ai jinghikai pura khnang ba yn lah ban pyntbit ïa ki samla ba donsap namar ba ngim lah kot bor ban siew ïa ka tulop jong u Coach. Hooid, ngim lah ban leh ba ha ka jingleit ïashim bynta sha Haryana bad Gujarat la pynlut da ka tnad sport hynrei ha kiba bun hi ngi hap ban pynlut nalade,” la ong u Bah Komen.
