Hapdeng ka jingduna dkhotmet ïeng u Bah Dispi ha ki kjat lajong, ai kam ruh ïa 4 ngut kiwei pat

Shillong, Risaw 26: Wat la kiba bun bah ki briew kiba ym don jingduna eiei ha ki dkhot met ki ud ba kim don kam don jam bad ki ai daw ba kim don lad ban trei kano kano ka kam kaban ai ja ai khaw ïa ki, hynrei uwei na ki rangbah ïa uba la tip kyrteng kum u Bah Dispi Kharbuli na ka shnong Laitlyngkot uba don ka jingduna dkhot met hynrei ka mynsiem trei shitom bad ka jingkut jingmut ban kamai da lade bad ban ïeng ha la ki kjat lajong wat hapdeng ka jingduna ki dkhot met u pyni nuksa ba ka mon ba jwat bad ka jingkut jingmut jong u briew ba wat hapdeng ki jingeh jingtynjuh kim lah ban khang lad ïa uno uno u briew uba angnud naduh ka mynsiem ban trei ïa kano kano ka kam.
Une u rangbah ha ka jingïakren bad ki nongthoh khubor u la ong ba ka jingkut jingmut jong u ban trei na bynta ban pyndap pynbïohng ïa ka ïing ka sem ka dei ka jingai mynsiem ba khraw tam ïa u.
U Bah Dispi u la ïathuh ba u la trei ïa kane ka kam ym duna ïa ka 30 snem bad kane ka kam kaba u trei ka dei ban shaiñ nar ban shna ïa ki wait ki mohkhiew, ki tari, ka tala bad kiwei kiwei de ki jait tiar bad ym tang katta u ong ruh ba u lah ban ai kam haduh saw ngut kiwei pat ha kane ka kaba u la seng.
U la ïathuh ba ym tang ba u ai kam ïa saw ngut hynrei u ju ai jinghikai ïa kiwei pat ki samla ym duna ïa ka 20 ngut kiba kwah ban nang ban trei ïa kane ka jaid kam kaba u trei.
Haba la kylli pat ïa ka jaka pynïaid ïew ïa ki mar u la ïathuh ba ïa ki mar ba u shna ki ju wan shim beit na ïing bad kham bun hi ki dei kiba ki briew ki la order lupa ba un shna.
Haba kylli pat la u don jingkwah ne em ban kham pynheh ïa kane ka kam u la ong ba na ka liang jong u kaei kaba u kwah ka long ban ïoh ka dukan ba un shong die ïa kine ki tiar kiba u pynmih khnang ban kham heh ka iew ka jingpynïaid iew bad ba un lah ban ai kam kham bun ruh ki samla.
Haba la kylli la na ka sorkar ka don ne em ka jingai jingïarap ba un pynheh pynïar ïa ka kam namar u hap ha ka thup Person With Disability u Bah Dispi u la ong ba kat haduh mynta um pat ju ïoh kino kino ki jingkyrshan kiba kum kata.
U Bah Dispi u la ai mynsiem ruh ïa ki samla kiba ym donkam donjam ba kim dei ban ap khmih lynti tang ïa ka kam sorkar hynrei ba ki dei ban trei da kino kino ki kam namar kan long ka jingmyntoi ïa ki hi bad kyntu ruh ba ki dei ban long kiba trei shitom bad kiba smat ba sting ba kin kynjoh sha ka kliar ka nam ryngkat ka kamai kaba biang.
U la ong ruh ba ki samla bad kiwei pat ki briew ki lah ban peit nuksa ïa u ba wat hapdeng ka ka jingduna dkhotmet u lah ban leh katne kiwei lei kiba biang ki dkhot met ki lah ban leh kham bha ban ïa u.