Yn shimkhia u CM ban kyntiew kyrdan ïa ka Sohra sha ka District

Kular ba ka Headquarter kan dei beit ha Sohra

0

Shillong, Risaw 26: Ka Sohra District Demand Forum (SDDF) mynta ka sngi ka la leit ïakynduh ïa u Myntri Rangbah ka jylla, u Conrad Sangma ban pynkynmaw ïa ka sorkar halor ka jingdawa ban kyntiew kyrdan noh ïa ka Sohra Civil Sub Division sha ka District.
Ha kane ka jingïa kynduh ka Forum nalor ba la ai da ka jingthoh kaba bniah bha ryngkat ki shithi kyrshan na ki spah tylli ki Shnong ba hap ha ka Shella Bhalaganj C&RD Block bad ka Khatar shnong- Laitkroh C&RD Block, la ai ruh ïa ka jingpyni ha ka Screen ïa ka map jong ka Sohra kaba dei ban ïoh kum ka District thymmai.
Na ka liang u Myntri Rangbah u la ai por ban shah shkor bha ïa kaei kaba ka Forum ka kdew bad pyni ha u bad balei ba ka Sohra ka donhok ban kiew kyrdan noh kum ka District, namar ba kadei kawei na ki Civil Sub Division kaba la rim bha ha ka jylla. Nangta ki la batai ruh ba ka Sohra ka la dei lypa ka jaka kaba pawnam naduh hyndai hyndai ha kylleng ka pyrthei.
U Myntri Rangbah u la kubur ba ka Sohra kadei hok ban kiew kyrdan noh ka District, hynrei u la pynpaw pat ba ka Sorkar ka don la ka jong ka plan na ka bynta ka jingthaw District thymmai ha ka jylla khamtam ïa ka Sohra. Ïa kane ka plan, u Conrad u la ong ba un sa phah sha ka Forum ba kan ïakren bad un sa bthah ruh ïa u Chief Secretary ka jylla, u Bah DP Wahlang, uba long u Chairman jong ka Committee pynkha District ba un peit bniah ïa kaei kaba la phah da ka SDDF.
Haba ïakren bad ki nongthoh khubor hadien ba ka wai kane ka jingïalang bad u Myntri Rangbah, u Secretary ka SDDF, u Bah John W. Thabah, u la ong ba ka jingïakynduh ka long kaba biang bha, namar ba u Myntri Rangbah u la ai ka por kaba kylluid bad sngap bha ïa ka jingbatai ka Forum. U la ong ruh ba u Myntri Rangbah u la kular ba lada wan ka District kaba thymmai la ka long ha kano kano ka dur ruh, ka Headquarter kan long beit ha Sohra, namar ba ka la biang lut ki jingdonkam khamtam ki ophis sorkar ban long kum ka jaka treikam jong ka District.
Na ka liang u Myntri Rangbah, haba ïakren bad ki nongthohkhubor, u la ong ba ki don katto katne ki mat kiba hap ban ïapynbeit bha na ka bynta kane ka District kaba thymmai kiba ka sorkar ka thmu ban leh. Dei namar kane ka daw ba kane ka kam ruh ka la sahkut noh katto katne por. Hynrei mynta ba ka Forum ka la wan ïakynduh biang ïa u, un bthah ïa u Chief Secretary ban pynïaid noh shaid shaid ïa ka kam.

Leave A Reply

Your email address will not be published.