Hapdeng ki ummat jingkmen pdiang burom ki paidbah ka Ri-Bhoi ïa ka kong Margareth Pathaw bad ka kynhun

Nongpoh, Risaw 26: Hapdeng ki ummat jingkmen bad ka jingsngew sarong halor ka nam bad ka burom bala wanrah da ka kong Margareth Pathaw na Umsning kaba la khur ruh ïaka takma ksiar naka lympung ïakhun kti bala tip kum ka World Arm Wrestling Championship 2022 kaba la long dang shen ha Antalya, Turkey, ki paidbah ka Ri Bhoi naduh ka seng KSU, RBDSA, Umsning Town Dorbar, ki khynnah skul bad ki paidbah mynta ka sngi kila pdiang burom ïa katei ka longkmie bad 9 ngut kiwei pat kiba la leit ban shim bynta ha katei ka lympung kiba la wan poi mynta ka sngi sha ka jylla.
Ïa katei ka jingpdiang burom la sdang naduh kad liengsuiñ ha Guwahati bala leit ban pdiang burom da ka Meghalaya Arm Wrestling Association, bad naka tnad ïalehkai ka jylla, bud da ka jingpdiang burom ka KSU ha Nongpoh, ka RBDSA ha Umsning Nongthymmai bad kumjuh ka jingpdiang kaba phuh ba phieng da ka Umsning Town Dorbar ha Umsning Town naduh ki khynnah skul bad ki paidbah kiba la kynhoi mar sien poi kitei ki nongïalehkai ha Umsning.
Kum ban shu pynpaw baka kong Margaret Pathaw na Umsning, Ri-Bhoi District kaba la leit ban mihkhmat ïaka ri India, haka lympung 43rd World Arm Wrestling Championship 2022 ha Antalya Turkey kala long ka lahduh haka pyrthei hadien ba kala lah ban pynliem noh ïaka Santos Anna na ri Brazil ban khur ïaka takma ksiar na katei ka lympung haka kyrdan Master Class Women 60kg Left Hand Category bad kumjuh ruh ka takma rupa haka Right Hand.
Nalor katei ka longkmie kiwei pat kiba khur takma na katei ka lympung ki kynthup ïaka kong Angel Mary Khunsyiem Mylliem Umlong kaba la khur ïaka takma rnong haka 60 kg Women’s Class bad u Alexander Lyngdoh u la ioh ban khur ïaka takma rnong haka 80 kg Mens Senior bala ioh ban pdiang burom lang ha katei ka sngi bad kumjuh kiwei pat ki bym shym la ioh khur takma.
Naka liang ki kynhun bapher bapher, naduh ki longkmie, ki kynhun ki samla bad kiwei kila ai ruh ïaki jingai sngewbha ha katei ka sngi sha katei ka longkmie.
Haba kren ha katei ka sngi naka liang ka Kong Margareth Pathaw, kala pynpaw ka jingsngew-kmen kaba khraw ryngkat ki ummat jingkmen halor katei ka nam bad ka burom kaba kala ioh ban khur kaba dei ka jingangnud la kumba 25 snem, wat hapdeng shibun ki jingeh bad ki jingtynjuh bad sngew kumba ka ding jong ka jingïakhun kan sa lip noh, hynrei lyngba ka jingai mynsiem u lok, ki khun, ki paidbah jong ka Umsning bad baieid bathoiñ kam shym la pynduh mynsiem ïa katei ka longkmie ban ïakhun bad dei mynta ka kynti ba katei ka jingangnud bad ka jingphohsniew baroh kala urlong hadien ba kala ioh khur syndon 2 tylli ki takma na katei ka lympung.
Kala ai ruh ka jingkhublei ba kyrpang ïaki paidbah ka Umsning, ki sengbhalang, ki nongïalam ka RBDSA, ka Umsning Town Dorbar bad baroh ki baieid ba thoiñ halor ka jingpdiang sngewbha hapdeng ka jingiphuh iphieng mynta ka sngi ryngkat ki ummat kiba jaw namar ka jinglung mynsiem halor katei jingpdiang burom ki paidbah.