Shillong, Risaw 24: Mynta ka sngi u Myntri Rangbah ka jylla Meghalaya u Conrad K Sangma u la pyllait paidbah ïa ka kot kaba la ai kyrteng “Values Must Come Alive” ïa kaba la thoh da u Rev Bishop Thomas Menamparampil SDB jong ka Guwahati ha Bianchi Hall, Mary Help of Christian Cathedral ,Laitumkhrah Shillong.
Haba kren kum u kongsan ha kane ka jingpynlait paidbah ïa kane ka kot, u myntri rangbah ka jylla u la ong “ ïa ka jingkordor jongka jingim ym shym la ïoh ban pynrung bha ha ki khynnah ba dang khie dang san kumba dei ban pyndep kumta ka jingpyllait ïa kane ka kot ka ïa hap dur bha bad kane ka juk kaba mynta namar ka jingniewkor ïa kiei kiei ki la sdang jah noh”.
“ Ka dei ka jingkordor bad jingniewkor kiba dei ki nongrim ba skhem kiba wanrah ka jingtei ïa ka ïing ka sem, ïa ka imlang ka sahlang, ïa ki seng bapher bapher bad wat ïaka sorkar ruh” ong u Myntri Rangbah.
Kane ka kot ka don khathyriew tylli ki lynnong bad kane ka kot kumba la pynsngew da u Pro David Syiemlieh ka kren ïa kiba bun bha ki bynta ha ka long briew man briew, ka jingïadei para briew bad kum juh ha ka synshar khadar ruh kum juh.
U Myntri Rangbah ka jylla u la ong ba kane ka kot kan pynmyntoi shibun wat ïa ki riew kiba don ha ka sain pyrthei, la ong ba u Rev Bishop Thomas u dei shisha u riew khraw kane ka thaiñ shatei lam mih ngi jong ka Ri India, ki riew khraw kim mut tang kiba don ha ka saiñ pyrthei.
Kiwei kiba la kren ha kane ka sngi ki long u Prof David Syiemlieh bala kren halor ka kot, u Rev Bishop Victor Lyngdoh Arch Bishop Shillong, ïa ka jingduwai shuwa ban sdang ïa ka jingïalang la ïalam da u Rev C Khognwir Moderator ba rim ka PCI bad pastor na ka Balang Presbyterian. La don ki jingrwai ruh na ka KJP Synod Sepngi, ki khynnah skul St Mary’s bad na ki Sister na Auxilium School Shillong.
U Rev Bishop Thomas u dei uba la shongthait na ka kam Archbishop jongka Guwahati. Ula trei kum u Bishop ka Dibrugarh 11 snem bad kum u Archbishop ka Guwahati 20 snem. U la ïoh ïa ka khusnam Ambasador of Peace ha u snem 2019 na ka International Human Rights Council. U dei u shakri jong U Blei uba trei ban wanrah ïa ka jingshong suk shongsaiñ bad u dei ruh uwei na ki nongplie shabi ïa ka jingkren iasuk bad ki kynhun bapher bapher ha Assam bad u la ju long ksiang ruh na ka por sha ka por.
