Haba ki nongïalam bahalor ka UDP ki kwah da kiwei kumno ngan phah ïa u khun: Bah JA Lyngdoh

Shillong, Risaw 22 : U Myntri barim ka sorkar jylla ba dei ruh u MLA barim ka UDP na Nongspung, Bah JA Lyngdoh u la pynpaw ïa ka jingkyndit halor ka jingphriang ki khubor kiba kynnoh ba u khun jong u, u don mynta ha ka jingartatien ban pan tiket UDP na Mawphlang constituency tang namar ba u kpa u la leit ban pynïasoh noh sha ka Congress bad khreh ruh ban aireng na Shillong North constituency.
U Bah JA Lyngdoh haba kren bad ki lad pathai khubor u la ïathuh ruh ba ka jingbymshai kumba la kynnoh da ki nongïalam ka UDP kam dei satia na u khun jong u hynrei kadei namar ka jingbymshai na ki nongïalam katei ka party hi.
Katkum ka jingïathuh jong u, ka jingïakren shaphang u khun jong u ban ïakhun na ka tiket UDP ka la mih hadien ba la bna ki khubor ba u MLA ba mynta um treh ïakhun shuh. U Bah JA ula ïathuh ba katei ka dei ruh ha ka por ba u la resain noh na ka BJP bad kumta kum u kpa u la pyrshang ban ïa kren bad ki nongïalam ka party na katei ka constituency ban ïoh jingshai shuh shuh khamtam haba ki nongïalam na katei ka party ki kwah ïa u khun ban ïakhun na ka UDP.
“Kumta hadien ba nga sngewthuh ba ka don shisha ka jingkwah na ki katto katne ki nongïalam ka UDP na katei ka constituency ba u khun jongnga un aireng na katei ka thain, nga la kylli na ki kaei kaba ki nongïalam na ka Central Body pat ki pynpaw. Ka jubab kaba ki ai ka long ba lada u MLA ba mynta um treh ïakhun shuh la bthah ïa ki ban phah noh da ka kyrteng jong uwei pat kyrtong uba dei na kawei ka party,” la ïathuh shuh shuh u Bah JA Lyngdoh.
U ong ruh ba hadien ba ki la ïohsngew ïa kata, kum ka iing ki la sangeh noh mardor namar ki nongïalam jong ka party na shajrong ki kham noh ka mon sha uwei pat u kyrtong. “Te kumta ngi rai ba ngin sangeh noh shuwa khamtam haba ngi ïoh jingtip ïa kaei kaba ki nongïalam bahalor jong ka party ki kwah. Dei na kane ka daw ngi la rai ba ngin ym leit shuh ban aireng na Mawphlang bad ban shu ngat ei ha ka jingriam.”
Shuh shuh u ong ruh ba kawei pat kaba pynlong ïa ki ban kynran dien noh kadei namar lada kam dei hi da ka mon jong ki nongïalam baroh lehse kan sa wanrah pynban ïaka jingïapait ha ka party.
“Hadien kane nga la kren bad uwei pat u paralok uba nga la jan bad ïarap bha bad pyntikna ba un jop ïa ka elekshon ha ki snem ba la dep, ban wad jingtip la kadei neem ba ki kwah ïa u khun jongnga ban ïakhun khnang ba kan pynsuk ïa ki ban pynkhreh namar nga ïalade hadien ba nga resain na ka BJP ngam pat rai ban leit pynïasoh sha kano kano ka party kumta ka pynsuk ïanga ban trei borbah na bynta u khun. Hynrei ka jubab kaba u ai ka long ba ym long shuh. Kumta haba ki ong ym long shuh te balei ngin shu leit. Kane hi ka pynpaw ba ka jingkhot kam dei kaba shai namar na ka liang ki nongïalam kila dep ban pynkhreh ban khot da uwei pat u kyrtong,” la bynrap shuh shuh u Bah JA Lyngdoh.
U ong ruh ba hadien ba ki la nang shai shuh shuh ka la nang pynskhem ba kin ym rung shuh sha ka UDP ha Mawphlang.
La ïathuh ruh ba hadien ba la kut kitei ki jingkulmar jingmut kiba dei sha Mawphlang, la mih pat sa ki nongïalam jong ki party bapher bapher kiba wan tyrwa ïa ka jingïatrei lang ha North Shillong. Kumban shu kdew hangne u Bah JA Lyngdoh uba aireng ha kato ka por na ka tiket BJP u la rem da ka said ha ka elekshon MLA kaba long ha u 2018 ha u MLA ba mynta Bah Adelbert Nongrum.
Kumta u la ong ba hadien ka jingïa phylliew jingmut kaba sani bad ka jingsorbe kaba bniah u la shim ïa ka rai ban pynïasoh noh sha ka Congress bad ruh ban mih kum u kyrtong jong ka party ha u 2023.