Dang mynta katto katne sngi ngi ïohsngew ba u Chairman ka Mawmluh Cherra Cements Ltd (MCCL) u bah Wailad Shylla ba ka karkhana pynmih dewbilat kaba nyngkong eh ha ka jylla kan sa ïateh bad kawei ka kompeni na Kolkata kaba kyrteng ka Bhavika Commercial Private Limited (BCPL). Ha kane ka juk internet mynta kam long kaba eh ban wad jingtip shaphang kano ka kompeni. Katba lah ban lum jingtip ïa kane ka kompeni la sdang dang tang ha u snem 2011 bad ka kam ba ka pynmih dewbsilat kumba 1.2 lak tonne shisnem. Hynrei ynda haba tih shuh shuh ym lah ban tip thikna ïa ka rukom trei kam jong kane ka kompeni.
Katba kiwei ki kompeni kum ka Lafarge-Umiam Private Ltd kaba tih ïa u mawshun na Nongtrai bad phah sha Bangladesh lah ban tip thikna ïa ka jingmih shisnem shisnem lane ka annual turnover ïa ka BCPL pat ym ïoh jingtip kaba shai. Ka Lafarge-Umiam ka thoh beit ha ka website jong ka kompeni ba ka jingmih ha ka shisnem ka long kumba 500 klur tyngka ei ei. Ka BCPL pat kam ai ei ei ïa kita ki jingtip kiba donkam khnang ban lah ban rai la ka lah shisha ne em ban pynïaid ïa ka MCCL bad haduh katno ka ‘experience’ jong kane ka kompeni ha ka ban pynmih dewbilat.
Ym lah ban sngewthuh balei ba kiwei ki kompeni pynmih dewbilat (cement company)ha Jaintia Hills ki lah ban ïohnong da ki spah klur ha ka shi snem hynrei ka MCCL pat ka dap ram rynjaiñ. Ka daw ka long ba ïa ki kompeni lah pynïaid da ki briew kiba lah pule management bad kiba lah don bha ka jingtip kumno ban pynïaid ïa ka kam bad ban the lakam ruh ïa ki nongtrei. Ki nongtrei ka MCCL ki kheiñ ïalde ba ki dei ki nongtrei sorkar. Hynrei haba trei ha kano kano ka kompeni hap pynïaid katkum ki kyndon kiba la buh da ka kompeni bad kita ki kyndon ki long kiba pyrkhing. Ym lah ban shim shuti katba mon lane ban wan trei slem bad leit phai sha ïing dang kloi. Bunsien hi ki briew jongngi kim sngewthuh ïa kane ka kolshor trei kam jong ki kompeni bad ki sngew ba ki lah ban leh mon kumba leh ki nongtrei sorkar. Dei na kane ka daw ba ki kompeni ba pynïaid ka sorkar baroh ki pheil lut, naduh la MeECL haduh ka MCCL. Shu kit tang ka ram shi rynjaiñ!
Hynrei mynta haba ka sorkar ka la rai ban wanrah da ka kompeni nabar ban ïatrei lang bad ka ha kata kaba la khot ka joint venture ha kaba ka sorkar ka don ka bhah jong ka ha ka MCCL kiba long ki kor tylliat mawshun bad ki kor pynkylla dewbilat ïa u mawshun. Na ka liang ka BCPL la khmih lynti ba kan wanrah ïa ka pisa bai seng (investment) bad ba kan pyntrei kam biang sa shisien ïa ka MCCL. Dei namar kata ka daw ba donkam ban wanrah da ka kompeni kaba don ïa ka nam bad ka histori trei kam kaba lah ban shaniah. Hynrei kumba ju jia ha kane ka jylla jongngi bunsien hi ym ju leh ïa kiei kiei baroh ha kaba shai. Ka don beit ka jingbyrngut bad ka jingbymshai ha kano kano ruh ka kam kaba ïadei bad ki kontrak kiba ïatrei bad ki kompeni kiba nabar.
Na ki khubor ngi tip ba u shongknor (chairman) ka MCCL uba dei ruh u MLA ka Jowai ryngkat bad ki ophisar sorkar ki la leit sha Kolkata ban leit jngoh ïa ka jaka trei ka BCPL shuwa ban ïasoi ïa ka soskular bad kane ka kompeni. Ym lah sngewthuh balei ba ym don da kiwei pat ki kompeni kiba lah kham don ka experience ba kin tyrwa ban wan shimti ïa ka MCCL. Ka MCCL ha ki por mynshuwa ka pynmih ïa u dewbilat uba bha tam bad uba lah pawnam ruh ha ka jingkhlaiñ jong u. Hynrei ka jingtlot ka MCCL ka dei na ka jingpynïaid torti bad namar ba ka jingïohnong na ka jingdie ïa ka dewbilat ym shym la pynleit sha ka kompeni hynrei la pyndonkam da ka sorkar ha kiwei pat ki kam. Sa kawei pat ka long ba ha kano kano ka kompeni ba don kti ka sorkar la shu thung tam palat ïa ki nongtrei. Ki kompeni shimet (private companies) ki thung kam beit thik kat ban biang. Ym tam tang uwei ruh u nongtrei namar na ka bynta jongki kaba kongsan tam eh ka long ka jingïohnong.
Kito kiba peitngor bha ïa kum kine ki jait kam ki la dei ban buh jingkylli la kane ka kompeni BCPL ka lah ne em ban trei bad pynkhie im biang ïa ka MCCL. Ka jingma ka long ba ïoh kam lah ban leh ïa kaei kaba ka kular. Ka sorkar ka dei ban pynshai kdar halor kino ki kyndon lah wanrah ïa kane ka kompeni bad kaei ka jingmyntoi na ka bynta ka jylla. Ym lah ban shu ïasoi khlem da pynshai paidbah ïa ki kyndon baroh namar ngi don ka hok ban tip kumno yn pyndonkam hok ïa u mar spah khyndew jong ka jylla.
